Barrutiz barruti ibiliko dira Errege Magoak igandean
Igande arratsaldean Antxon, Donibanen, San Pedron eta Trintxerpen izango dira Meltxor, Gaspar eta Baltasar. Desfileek trafikoan eragina izango dute.
Etxeko txikienak adi egon daitezela, igande honetan (hilak 5) helduko baitira Errege Magoak. Lau barrutietan barrena ibiliko da hirukotea, arratsaldean. Honakoak izango dira Meltxor, Gaspar eta Baltasarrek egingo dituzten desfileak, barruz barruti:
- San Pedro: 18:30ean Pabloenea kaletik helduko dira, honako ibilbidea egiteko: Urrestarazu Anaiaren kalea, Ricardo Arrillaga kalea, Daniel de Castelao kalea, frontoiko Zumardia aldapa, Tirri-Tarren plaza, Ingeniero Markina kalea, Esnabide kalea, Ingeniero Markina kalea, Arraunlari kalea, San Pedro kalea eta San Pedroko parrokia.
- Donibane: 17:00etan helduko dira hiru Errege Magoak Nabalaldeatik. Ibilbide hau egingo dute: Meipiko biribilgunea, pilotalekua, Bordalaborda, San Roke, San Juan XXIII, pilotalekua, Donibane kalea, Bonantzako arkua eta Santiago plaza. Euria egiten badu, honako bidea egingo du hirukoteak: Nabalaldea, Meipi, Bizkaia plaza eta Santiago plaza. Igandean Donibane kalea itxiko dute eta Santiago plaza autorik gabe utzi beharko da.
- Trintxerpe: 16:30ean pantalanera iritsiko dira Errege Magoak, Euskadi etorbidetik alkateordetzaraino joateko. 18:45ak arte haurren eskutitzak jasoko dituzte bertan. Orduan hasiko dute desfilea, honako ibilbidea egingo dute: Gudarien plaza, Euskadi Etorbidea, Jaizkibel kalea, Azkuene, Euskadi etorbidea eta alkateordetza. 21:00etan, kamionetan, ibilbide zabalagoa egingo du hirukoteak.
- Antxo: 18:30ean, Lore Txorta elkartetik aterako dira Blas de Lezo, Eskalantegi eta Kupeldegitik pasa ondoren Kultur Etxean bukatzeko. Bertan haurren eskutitzak jasoko dituzte.
Lau barrutietako kabalgatek trafikoan eragina izango dutela jakinarazi du Pasaiako Udalak, bereziki San Pedron eta Trintxerpen. Trintxerpen, 18:45etik 20:30era, Euskadi etorbidea itxiko dute. Desfilea lehenago pasako balitz, 20:30ak baino lehen berrirekiko dutela aurreratu du Udaltzaingoak. Tarte horretan taxi eta autobus geltokiak tokiz aldatuko dituzte. Ziriza eraikinaren ondoan hartu beharko dira taxiak, eta autobus geltokia, berriz, Karbonesen (La Herrera, Zirizako aparkalekuaren ondoan) izango da.
E09 autobus lineak geldialdi berezia egingo du igandean, Eskalerrilas behealdeko portu eremuan hain zuzen (Gudarien plazako geralekua ordezkatuko du behin-behineko honek). Hortaz, bi aukera izango dira arratsaldean autobusa hartu eta bertatik jaisteko: Zirizaren atzealdea edo Eskalerrilaseko eskaileren beheko aldekoa.
Trafiko aldaketek irauten duten bitartean Karboneseko eremua autobusetik jaitsi eta igotzeko erabili ahalko da soilik, horretarako esklusiboki egongo baita zabalik. Hortaz, errepidera ez irteteko eskatu diete bizilagunei La Herrerako eremuan.
San Pedroko aldaketei dagokionez, barrutira sartu eta bertatik ateratzeko goiko auzoak erabili beharko dituzte auzotarrek.
