'Zerua lapurtu dute!' ipuin diskoa aurkeztu dute Albaolan
Katxiporreta pailazo kooperatibaren eta Aranzadi Zientzia Elkartearen elkarlanaren ondorioa da ipuin diskoa. Albaolan egin dute aurkezpena, eta hiru abestiren bideoklipak grabatu dituzte Albaolako Lagun Txikienekin batera.
Pasai San Pedroko Albaola Itsas Faktorian aurkeztu dute gaur Zerua lapurtu dute! ipuin disko ilustratua Pirritx, Porrotx, Marimotots eta Albaolako Lagun txikienek. Haurrei eta familiei zuzendutako lana da, eta Aranzadi Zientzia Elkarteko astronomia sailarekin elkarlanean, Virginia Garcia Pena Birtxi Aranzadiko astronomia saileko dibulgatzaile sanjuandarra da kontakizunaren protagonista. Aurkezpenean izan da Garcia ere, Xabier Agote Albaolako presidentearekin batera.
Argi kutsadura, pantailen erabilera eta naturaren zaintzearen garrantzia du ildo ipuinak, eta Leire Bilbao arduratu da idazteaz. Aldiz, ilustrazio lana Irrimarrako Karmele Gorroñorena izan da, eta Xabier Zabalak sortu eta moldatu ditu diskoko kantuak. Liburua denda fisikoetan eta Aranzadiren orrialdearen bidez eros daiteke.
Ipuina irakurterraza dela adierazi du Pirritx pailazoak, eta abestien arteko ipuintxoetan zeruaren eta unibertsoaren inguruko gauza gehiago jaso dituzte. Esate baterako, izarrak neguan hobe ikusten direla. “Zeruko izarrik distiratsuena Siriu izenekoa da, eta egun hauetan oso ongi ikusten da”, azaldu du Garciak.
Ipuin disko honetan material didaktikoa ere topa daiteke, eta horretarako ipuinaren azken orrian dagoen QR kodea eskaneatu behar da. Bestela, Katxiporreta pailazo kooperatibak eta Aranzadi Zientzia Elkarteak elkarlanean sortutako orrialde honetan topa daiteke. Porrotx pailazoak aurreratu du poliki-poliki orrialdea elikatzen joango direla.
Urte asko darama Aranzadik natura eta kulturaren babesa ipar orratz lanean, eta zerua eremu natural eta ondar kultural gisa aldarrikatzen dute. Zerua lapurtu dute! gaia gizarteratzeko “aurrerapausoa” da elkartearentzat.
Zerura begiratzeko ohitura galdu dugula ohartarazi du dibulgatzaile pasaitarrak aurkezpenean, eta hori berreskuratzearen garrantzia nabarmendu du. Mugikorretako GPS sistemarik gabe bidea jakiteko balio duela argudiatu du Garciak. Gaur egun zerura begiratzean izarrak ez direla ikusten deitoratu du Garcia dibulgatzaileak, eta farolek goraka argiztatzea dela horren arrazoietako bat zehaztu du. “Horregatik deitu diogu lanari Zerua lapurtu digute!“.
Ez da ausazko erabakia izan da proiektu hau Albaolan aurkeztea, nabigazioa oso lotuta baitago zeruarekin. Agote presidenteak adierazi gisan, izarrak begiratzeko lekurik egokiena itsasoa da, ez baitago gizakiak sortutako argirik han. “Izarrek norabidea hartzen laguntzen dute eta ipar izarra da horretarako garrantzitsuena. Izan ere, mugitzen ez den izar bakarra da eta iparra markatzen du”.
Bideoklip grabaketak
Gaurkoan proiektua aurkezteaz gain, diskoko hiru abestiren dantzak eta bideoklipak grabatu dituzte Albaolan. Orotara, 17 abesti jaso dituzte euskarri borobilean, eta horietatik lau dira berriak: Altxa burua, Nanoplaneta, Piztu iluna eta Ipurtargia.
Aipaturiko lehenbiziko hiru abestien bideoklipak dira gaur grabatu dituztenak. Koreografia Izaskun Forcadak sortu eta gidatu du. San Juan baleontziaren aurrean grabatu dute Nanoplaneta abestiaren bideoklipa eta dantza, HITZA grabazioan egon da. Ikus bideoa eta argazkiak albistearen bukaeran.
