Agenda beteta hasi du urtea Urdaburu Mendizale Elkarteak
Ipar martxa irteera antolatu dute larunbaterako eta Arabako Biraren 22. etapa hilaren 18rako. Abuztuan berriz, Frantziako Alpeetara bidaia antolatu du elkarteak.
Urdaburuk antolatutako ipar martxa baten artxiboko irudia Ez dago aspertzeko aukerarik Urdaburu Mendizale elkartearekin. Prakak bete lan hasi du urtea eta kirolarekin harremanetan gozatzeko hainbat aukera jarri ditu herritarren eskura. Horietako lehena, larunbatean bertan izango da. Izan ere, ipar martxa irteera egingo du Donostiako parkeetan barrena. 09:05ean elkartuko dira Iztietako autobus geltokian eta E03 autobusa hartuko dute —09:11n abiatzen da geltokitik autobus linea hori—.
Ibilaldia 10 kilometro ingurukoa izango da, eta Miramongo parkean hasita, Puio eta Aieteko parkeak zeharkatuta, Amaran bukatuko dute irteera. Parte hartzeko izena eman behar da, eta bihar —hilak 10, osteguna— da horretarako azken eguna. Izen ematea Urdabururen egoitzan egin behar da, idazkaritzan aurrez aurre edo telefonoz (astearte eta ostegunetan 19:00etatik 21:00etara). Telefono zenbakiak, honakoak: 943 52 78 79 edo 686 59 67 32. Online egiteko aukera ere badago, horretarako klik egin hemen.
Hurrengo asteburuan ere bada zer eginik Urdabururen eskutik. Hilaren 18an, larunbatarekin, Arabako Biraren 22. etapa antolatu du. Okondon hasita, Gallarraga, Ganekogorta, Kamaraka eta Goikogane gailurrak igarota Aretan bukatuko dute ibilaldia. Zeharkaldia 6,5 ordukoa izango da, eta xehetasun guztiak Urdabururen web orrian kontsulta daitezke (klik hemen).
Irteera 07:30ean egingo dute Zumardiko autobus geltokitik, Panier aldetik, eta 07:45ean Aritzetatik. Izena eman nahi dutenek telefonoz, presentzialki edota online galdetegia beteta egin dezakete (klik hemen).
Frantziako Alpeetara bidaia
Abuztuan, berriz, Ecrins eta Queyras mendietara, Frantziako alpeetara bidaia antolatu dute. abuztuaren 16tik 23ra egingo dute bidaia hori, eta prezioa 880 eurokoa da. Plaza kopuruarei dagokionean, gutxienez 36 eta gehienez 45ekoa izango da. izena emateko epea hilaren 14an zabalduko dute 19:00etan Urdaburuko bazkideentzat eta hilaren 21ean 19:00etatik aurrera gainontzekoentzat. Izena emateko galdetegia bete behar da (klik hemen). Izena ematearen ordena errespetatuko du elkarteak.
