Arditurri 3 erromatar garaiko galeria ezagutzeko aukera izango da
Hilaren 19an izango da hitzordua, eta bi txanda egingo dituzte; bata gaztelaniaz eta euskaraz bestea. Erreserba aurrez egin behar da.
Urte berriari hasiera eman eta segituan eman du Arditurrik lehen jarduera bereziaren berri: Arditurri 3 erromatar garaiko galeriara bisita. Hilaren 19an izango da, eta bi txanda egingo dituzte: goizeko hamarretan gaztelaniazkoa eta hamaika eta erdietan euskarazkoa.
Ez da ohikoa galeria hori zabaltzea, beraz, bisitara joaten direnek duela 2.000 urte meatzariek egin zuten lana bertatik bertara ezagutzeko aukera izango dute.
Antolatzaileek jakinarazi dute galeriaren tamaina txikia dela, eta plaza mugatuak dira. Bisita hamalau urtetik gorakoentzat izango da, eta hamar euro balio du. Erreserba aurrez egin behar da 943 49 42 49 eta 688 89 50 68 zenbakietara deituta edo mezu elektroniko bat idatzita.
