Indartsu dator Jabetze Eskolaren negu-udaberriko programa
Jarduera berriekin hasiko dute urtea eskolako emakumeek. Hilaren 30era arte eman daiteke izena.
Joan den otsailaren 25ean dozenaka emakumek eskolaren urteurrena ospatu zuten Juanba Berasategi aretoan. Eguberrietako oporraldiaren ondoren, Pasaiako Jabetze Eskolak martxa hartu du berriro. Negu-udaberriko programa aurkeztu berri dute, eta jakinarazi dute datorren asteazkenetik (hilak 15) aurrera eman daitekeela izena. Hilaren 30a (osteguna da) izango da horretarako azken eguna.
Honakoak dira jarduerak:
- Jan sano eta pozik bizi, Tatiana Arzelus Makazagarekin. Gorputza zaindu eta sistema immunea osasuntsu mantentzeko elikadura praktika osasuntsuak partekatuko dituzte kideek. Antxoko Kultur Etxean eta Basari Elkartean izango dira saioak, otsailaren 5, 12, 19 eta 26an; martxoaren 5, 12, 19 eta 26an; eta apirilaren 2an.
- Coaching feminista: ezagutza, onarpena eta zaintza, Nerea Redondo Otamendirekin. Emakumeen funtzionatzeko eraren inguruan hausnartuko dute bertan, indarguneak eta ahalguneak identifikatuz. San Pedroko Palazio Txikin izango dira saioak, ostegunetan, 17:00etaitk 19:00etara, honako egunetan: otsailaren 10, 17 eta 24an; eta martxoaren 10, 17 eta 24an.
- Emakume filosofoak, Marisa Hurtado Caballerorekin (gaztelaniaz bakarrik izango da hau). Emakume filosofoen ekarpenak aztertuko dituzte, bereziki garai atzerakoiei aurre egin dieten pentsalariak. Trintxerpeko Ulia Kultura aretoan izango dira saio hauek, ostegunetan, 17:00etatik 19:00etara, honako egunetan: otsailak 13 eta 27; martxoak 13 eta 27; apirilak 4 eta 18; eta maiatzak 8.
- Beste urtaroa, bizitzaren beste erdia klimaterioatik hartarago, Elene Jimenez eta Maria Lopez Altunarekin. Menopausiaren inguruan ematen diren aldaketak ekartzen dituen zailtasunak kudeatzeko eta hobeto bizitzeko gakoak emango dituzte. Trintxerpeko Ulia kulturgunean bilduko dira, ostegunetan, 18:00etatik 20:00etara, honako egunetan: martxoak 20; apirilak 3; eta maiatzak 15, 22 eta 29.
Jarduera hauez gain, eskolako arduradunek jakinarazi dute urteko osoko talde eta guneetan parte hartzeko izen ematea berriro zabalduko dela. Honako taldeak dira: Jatorri askotariko emakumeen taldea; indarkeriarik gabeko espazioa; ongi zaintzen eta maitatzen ikasteko taldea; emakumeak korrikalari eta emakume palistak taldea; eta jatorri askotariko emakumeak elkar ezagutzeko gunea.
Izena emateko HAZ bulegora jo edo bestela, lotura honetara jo daiteke.
