Lehen sektoreko ordezkapen zerbitzuaren balantzea egin dute
Iaz jarri zuten martxan zerbitzua, eta Oiartzungo lehen sektorea babestea eta indartzea dira haren helburu nagusiak.
Iaz jarri zuen martxan Oiartzungo Udalak lehenengo sektoreko ordezkapen zerbitzua herriko nekazaritza eta abeltzaintza proiektuak indartzeko, eta, oraintsu, joan berri den urteko balantzea egin dute. Zehazki, 63 egunez erabili da zerbitzua.
Behemendi Landa Garapenerako elkartearen bitartez pertsona bat kontratatu zuten herriko nekazaritza eta abeltzaintza ustiategietara laguntza ematera joateko; era horretan, oporraldietarako, ospakizunengatik egun libreak hartzeko, bajaren bat dagoenean ustiategiak martxan jarraitzeko edota eskulan gehigarria behar denerako pertsona horren laguntza doan eskatzeko aukera dute herriko ustiategiek.
Pasa den urtean, 2024an, alegia, herriko zazpi ustiategik baliatu zuten laguntza hori, eta horren aurrean balorazio “oso positiboa” egin du Ibon Mitxelena Burujabetzen zinegotziak. Nekazari eta abeltzainek zerbitzua “asko eskertu dutela” eta “haien lan karga arintzeko baliagarria” izan dela azpimarratu du. “Ustiategiak langile profesional baten esku utzi eta deskantsurako tartea hartzeko aukera izan dute herriko ekoizleek”.
Era berean, kontsumitzen diren elikagaiak bertan ekoizteko lehen sektorearen iraunkortasuna ezinbestekoa dela gehitu du Mitxelenak. Hots, gaineratu du “sektoreak dituen erronka espezifikoei erantzuteko” jarri zutela martxan.
Azkenik, ordezkapen horiek eskatzeko aukera urte guztian dagoela gogorarazi du zinegotziak. “Geroz eta ustiategi gehiago ari dira zerbitzua erabiltzen eta orain arte eskatu ez dutenak ere animatu nahi ditugu probatzera”.
Lehen sektoreko 0,5 Nekazaritzako Lan Unitate baino gehiagoko ustiategietara dago zuzendua zerbitzua. Urtean hamar egunez erabili daiteke (bajen kasuan kopurua luzatu daiteke), gehienez sei egunez jarraian eta egunean zortzi orduz.
Zerbitzuaren inguruan informazioaren bat nahi izanez gero, Behemendi elkartearekin harremanetan jartzeko telefono zenbaki bat ahalbidetu dute: 943 49 02 19.
