Xanju Kirol Klubeko gazteak, Euskal Kros Ligako elitean
Euskal Ligako 16 urtez azpikoetan bigarren izan dira Izaro Duran Filguerias eta Jon Porta Vicente. Taldeka, mutiletan, zilarrezko domina sanjuandarrentzat.
Euskal Kros Ligaren hirugarren ekitaldian emaitza bikainak eskuratu ditu Donibaneko Xanju Kirol Klubak. Joan den igandean egin zen Ordiziako Oiangu parkeko zirkuitu lokaztu eta zailean 2024-2025eko ligako azken proba, aldi berean Euskadiko Kros Txapelketa ere izan zena, Txindoki Atletismo Taldeak antolatua. Ligari dagokionez, 16 urtez azpiko kategorian emaitza handiak lortu dituzte klub sanjuandarreko kideek.
Hala, 16 azpikoen mailan eta banakakoen modalitatean, Jon Porta Vicente gizonetan eta Izaro Duran Filguerias emakumeetan ligako bigarren postuak eskuratu dituzte. Hori gutxi balitz, 16 urtez azpikoen taldekako gizonen kategorian, hirugarren izan da Xanju Kirol Kluba Gernikako eta Laudioko taldeen atzetik; Bidasoa Atletismo Taldea (BAT), Gipuzkoa mailako potentzia handienetako bat, laugarren izan zen sailkapen horretan.
Horrez gainera, Xanjuren harrobian hezitako eta egun BATeko kide den Mikel Aramendi sanjuandarra 20 urtez azpikoen ligako onena izan zen. Aldiz, igandean Ordizian jokoan izan zen Euskadiko Txapelketan haren anai biki Ander Aramendik lortu zuen txapela. Beheko irudikoak dira Aramendi anaiak.
Xanjuko kideak, nola ez, pozarren dira lortutako guztiagatik. “Oso harro gaude gure korrikalari gazte guztiek 2024-2025 sasoiko euskal krosetan eman duten mailagatik”, esan dute.
