Hikaren 'Zorretan', igandean Donibanen
Hika Teatroak 'Zorretan' antzezlana interpretatuko du hilaren 26an Juanba Berasategin, 19:00etan. Sarrerak salgai daude Bibe atarian.
Hika Teatroa konpainiak Zorretan antzezlana interpretatuko du igandean (hilak 26) Donibaneko Juanba Berasategi aretoan, 19:00etan. Zaintza eta maitasunari buruzko tragikomedia absurdo eta poetiko bat da Zorretan. Emanaldia euskaraz izango da. Sarrerak salgai daude Bibe atarian, 11,11 euroan.
Sinopsia: Emakumea eta gizona bikote dira aspalditik. Gaur emakumea aztoratuta iritsi da etxera. Amarekin telefonoz hitz egin du eta beraiekin bizitzera datorrela ulertu dio. Uste du hori dela bere egonezinaren arrazoi, eta etxera iristean, gizonari kontuak eskatzen hasiko zaio. Hau ere ez dago bere onenean, ordea. Egun handietarako erabiltzen duen gorbata berdea aurkitzen saiatzen ari da eta urduri dago. Are urduriago emakumeak berea den pijama soinean duela jantzita ikustean. Joan egin behar du, baina ezerk ez dirudi lekuan. Etxea aldrebestuta izateaz gain, badirudi bizitza dela aldrebestu zaiena. Emakumea normaltasunera itzultzeko borrokan ari da, baina lur azpian hondoratzen ari dela sentitzen du eta eusteko moduan daukan esku bakarra amarena omen. Emakumeak, ez du nahi eta uko egiten dio hori horrela izateari. Nahiago lur azpian bizi azal lodiko sator bihurtuta amarekin baino.
