Sahararen egoera aurkeztu du Bixi-Bixik
Donibaneko elkarteak hiru ataletan banatu zuen atzoko hitzaldia: Saharako egungo egoera, abenduan egindako elkartasun bidaia eta Oporrak Bakean programaren aurkezpena.
Bixi-Bixi elkarteak Sahararen inguruko hitzaldi bat eskaini zuen atzo Donibaneko Kultur Aterpean. Itziar Goienetxea Bixi-Bixiko kideak adierazi du hitzaldi hori hiru ataletan banatu zutela, betiere Sahara muinean. Alde batetik, Saharako egoera azaldu zuten. Bestetik, abenduan Saharara egindako elkartasun bidaiaren nondik-norakoak kontatu zituzten. Azkenik, Oporrak Bakean programaren inguruko ildo nagusiak plazaratu zituzten.
Saharako egoerari dagokionean, Goienetxeak nabarmendu du sahararrek 50 urte daramatela bizitzen “infernu” batean. Elkarteko kide batek ipuin antzeko bat baliatu zuen pairatzen duten egoera azaltzeko.
Horren ondoren, abenduko egonaldiko xehetasunak aurkeztu zituzten. Honakoa izan da Bixi-Bixikoak Saharan izan diren seigarren aldia, eta han zertan ibili diren kontatu zuten. 2023an, ministro askorekin elkartzeko eta hango egoera bertatik bertara ezagutzeko aukera izan zuten. Saharan dituzten beharrak identifikatuta, diagnostiko bat egin zuten, eta Goienetxeak jakinarazi du online proiektu bat abiatu dutela sahararrei laguntzeko. Proiektu hori hiru ataletan banatu dute: osasuna, irakaskuntza eta lana.
Goienetxeak aitortu du sahararrek begi onez ikusi dutela online proiektu horren sorrera, eta hango egoera informatizatzeko eta helarazteko zirrikitu bat ikusi dute hari esker.
Bidaian, gainera, hainbat arlotan jardun dira: gor-mutuen eskola bat gaitu dute, ur deposituak garatzen jarraitu dute, emakumeen erditze kontsultak gaitu eta materialez hornitu dituzte eta emakumeei ahalduntzeko tresnak eman dizkiete.
Azkenik, Oporrak Bakean programaren aurkezpena Pasaiara ekarri zuten. Egitasmo hori iragan larunbatean aurkeztu zen Donostian, eta Pasaiak eta Lezok parte hartze aktiboa dute bertan. Atzoko saioan, bideo bidez aurkeztu zuten programa, eta bere garrantzia nabarmendu zuten. Izan ere, haur sahararrei bi hilabeteko aterabide bat eskaintzen zaie programa horri esker, han 50 gradu baino gehiago egiten baititu uztailean eta abuztuan, eta haurrak handik ateratzea da helburua. Horrez gain, Euskal Herrian osasun eta oftalmologia zerbitzua eskaini edota osasuntsu elikatzeko aukera ematen zaiela baietsi du Goienetxeak.
