Ikusezin izan diren emakumeen lana aldarrikatzeko, murala
Emakume eskorgarien murala egin du Berexiart artistak, eta gaur egin dute aurkezpen ekitaldia, Trintxerpen.
Berexiart artistak emakume eskorgarien murala egin du Trintxerpen, Pasaiako Udal Euskaltegiaren parean, eta gaur aurkeztu dute berau “Pasaiako portuetan historikoki emakumeek izan duten funtsezko rola aitortzeko ez ezik, oro har, urte luzez itzalpean egon diren emakume langileen lanak argitara ateratzeko helburuarekin”. Pasaiako Berdintasun Mahaiak bultzatu du ekimena. Aurkezpen ekitaldian Berdintasun Mahaiko kideak zein bizilagunak izan dira, eta bertan historian zehar itsas komunitateetan emakumeek egin duten lan garrantzitsua azpimarratu dute: arrainaren manipulazioa, saregintza, portuko zamalanak, arrain salmenta…
Muralean emakume eskorgariak ageri dira; salgaiak ontzietatik biltegietara eta merkatuetara garraiatzen zituzten eskuzko orgak erabiliz. Zehaztu dutenez, jarduera oso gogorra izateaz gain, “gutxietsia izan da historian zehar, eta ez da oso dokumentatua izan. Horregatik, adierazten dugu gure asmoa dela marra, kolore eta irudi bakoitza beste emakume langile guztien aintzatespen eta justizia sinbolo izatea”.
Portuko emakume langileek memoria berreskuratzen
Bestalde, Laura Re Pasaiako Berdintasun zinegotziak ekimenaren garrantzia nabarmendu du agerraldian. “Portuaren bueltako langintza eta jardueretako asko emakumeek egin izan dituzte urte luzez; askotan, gainera, baldintzaz gogorretan eta aitortzarik gabe. Ikusezin izan dira horiek gure portuen inguruko kontakizunetan, eta itzaletik argitara ateratzea izan dugu asmo ekintza honekin. Ez soilik portu jardueran ibili diren emakume langileak, baizik eta, orokorrean, gizarteak sekula aitortu ez dituen lan feminizatuak”.
Ekimen honen bidez Pasaiako Berdintasun Mahaiak portuko emakume langileen memoria berreskuratu eta haien lana ikusgai jarri nahi izan du. Murala herritar guztien esku dagoen oroigarri bisual gisa geratuko da Trintxerpen “emakume horiek Pasaiako historian izan duten eragina gogorarazteko eta euren ekarpena aitortzeko”.
