Konpartsek izena eman dezakete Trintxerpeko inauterietan
Trintxerpeko Jai Batzordeak prest ditu aurtengo inauteriak: martxoaren 7tik 9ra izango dira. Otsailaren 3a da konpartsen desfilean izena emateko azken eguna.
Hilabete eskas geratzen da inauteriek eztanda egiteko. Pasaiako barrutiak martxoaren 1ean murgilduko dira mozorroen zurrunbiloan. Trintxerpetarrak, baina, ohi bezala, astebete beranduago murgilduko dira festa giroan, martxoaren 7tik 9ra bitartean izango baitira haien ospakizunak. Trintxerpeko Korkoiburuek, gainera, aukeratu dute mozorrotzeko gaia, eta lanbidez eta ogibidez jantziko dute barrutia.
Trintxerpeko Jai Batzordea ere buru-belarri dabil inauteriak prestatzen, eta komisioak aurreratu du otsailaren 3ra arte dagoela konpartsen desfilean izena emateko epea. Desfilean parte hartu nahi duten konpartsek araudiaren azken orrialdean dagoen inprimakia bete beharko dute. Fitxa beteta, helbide elektroniko bidez bidali beharko dute izena emateko orria. Horrez gain, izena ematen duten konpartsa guztiei dei egin diete Trintxerpeko Alkateordetzan egingo den bilera informatiboan parte hartzera. Bilera otsailaren 5ean izango da, 19:30ean.
Adinberriko obrak direla eta, desfileak aldaketa txiki batzuk izango dituela jakinarazi du Pasaiako Udalak. Jarduketa horien ondorioz, ibilbidea apur bat murriztuko da. Informazio gehiagorako, udaleko Kultura sailaren telefonoa (943 34 40 34) ahalbidetu du udal erakundeak.
