Otsailean hasiko dira Luzuriaga birgaitzeko lanak
Atzoko osoko bilkuran udalbatzak aho batez onartu zuen Luzuriagako obren lehen fasearen lanen esleipena. Udalak aurreratu du otsailean hasiko direla jarduketak.
Atzo urteko lehen osoko bilkura egin zen Pasaiako udaletxean. Bilkura horretan, udalbatzak aho batez onartu zuen Luzuriagako obren lehen fasearen lanen esleipena. Esleipena onartuta, 15 eguneko erreklamazio epea zabalduko dela jakinarazi du Pasaiako Udalak, eta erreklamaziorik aurkezten ez bada, kontratua sinatzen denetik lanak hasteko epea bi astekoa izango da. Gauzak horrela, udalak aurreratu du otsailean hasiko direla bulego eraikin historikoa birgaitzeko jarduketak. Halaber, lehen fasearen iraupena 14 hilabetekoa izango dela aurreikusi du udal erakundeak.
Kontratazio prozeduran bost enpresek aurkeztu zituzten obrak egiteko eskaintzak. Proposamenak aurkezteko epea bukatu ondoren, eta eskaintzen balorazioa eginda, kontratazio mahaiak hilaren 21ean onartu zuen obren esleipena.
Lehen faseko lanetan, besteak beste, honakoak egingo dituzte: eraikinaren barne egituraren zati baten eraistea, egiturak egonkortzea, zimendu berriak jartzea eta metalezko egitura berrien sorrera. Horrez gain, eraikina iragazgaiztu eta isolatuko da, eta inguruak urbanizatzeko hainbat jarduketa egingo dituzte. Orotara, 4.621.941,25 euroko aurrekontua izango dute lanek, BEZa barne.
