Ereindako hazia ospatuko du Oiartzun KEk, gaur
Oiartzun Kirol Elkarteak 'Ereindako hazia, 50 urte futbolean' izeneko ekitaldia antolatu du gaur arratsalderako. 50 urte bete ditu klubak, eta hori ospatuko dute. Hala ere, urtean zehar jarduera gehiago egingo dituztela aurreratu dute.
Enrike Lekuona Oiartzun Kirol Elkartearen zelai berrian.Leire Perlines Klub batek ez ditu egunero 50 urte betetzen; Oiartzun Kirol Elkarteak, aldiz, bai, eta hori handira ospatuko dute gaur arratsaldeko seietan Landetxen egingo duten ekitaldiarekin.
Enrike Lekuona klubeko lehendakaria da. Harreman estua du taldearekin, jokalari, entrenatzaile eta zuzendaritza taldeko kide izan baita zenbait urtetan. 2004. urtean eman zituen entrenatzaile moduan lehen pausuak, eta duela bi urtetik da klubeko lehendakari, Koldo Fernandez aurreko lehendakariaren bigarrengoa baitzen.
Club Deportivo Oyarzun moduan sortu zuten futbol kluba duela mende erdi, eta gaurko ekitaldia urteetan zehar lanean aritu den jendea omentzeko baliatuko dute. “Uste dut ondo datorrela errekonozitzea ezagutzen ez dugun jendeak egin duen lana. Lanean aritu den jende horrek merezi du aipamen bat”, dio Lekuonak.
Gala labur bat izango dela aurreratu du lehendakariak, 40 minutu ingurukoa, eta bertsolariak, abeslariak, abesbatza eta omenduak ere izango dira oholtzan. Gainera, bideo bat ere proiektatuko dutela azaldu du.
Horretaz gain, luntx bat ere egongo da “bertaratzen direnak euren artean hitz egin dezaten eta garai zaharrak oroi ditzaten”.
Ekitaldi sorta prestatuko dute
21 taldek osatzen dute kluba, 501 kirolari barnebiltzen dituztenak. Emakumezkoen zortzi talde eta gizonezkoen hamahiru talde daude; horietatik bik areto futbola egiten dute. “Zenbaki handiak dira eta konplikatua da horrenbeste jende lanean aritzea”, jarraitu du Lekuonak.
50 urteak ospatzeaz gain, badute pozik egoteko beste arrazoi bat: zelai berria. Pozik agertu da Lekuona. Hori ere ospatuko dute obrak amaitzen dituztenean, “zelai berriarekin beste kalitate eta maila bat emateko aukera izango baitiegu bai entrenatzaileei eta baita jokalariei ere”. Karla Lekuonako obrak bitartean talde nagusien entrenamenduak eta partidak Lezoko Plazetan egin dituzte, eta eskerrak eman nahi izan dizkie oiartzuarrak. “Lezoko Allerru zoragarri portatu da gurekin, hortaz, besarkada bat lezoar guztiei eta gurekin lanean aritu direnei”.
Urtean zehar “ekitaldi dezente” egingo dituztela azaldu du Lekuonak, honakoak zerrendatu ditu: argazki zaharren erakusketa, Realeko beteranoekin partida, bertso derbi bat… Asmoak dira oraindik, hortaz, oraindik ezin dira konfirmatu horiek.
