Autobus Magikoa talde oiartzuarra eszenatokira itzuliko da
Hatortxu Rock jaialdia hainbat musika talderen itzulera iragartzen ari da gaur, tartean, Autobus Magikoarena. Hatortxu Rockekoaz gain, beste emanaldi bat ere egongo dela iragarri du taldeko abeslariak.
Zazpi urteren ondotik, eszenatokira itzuliko da Oiartzungo Autobus Magikoa taldea. Hatortxu Rock jaialdiak gaur hiru musika talderen itzulera iragarriko zuela adierazi ostean, gaur eguerdian NAIZ Irratiak eman du esklusiba, Gotzon Retegi taldeko abeslariarekin izandako elkarrizketa batean.
Badira hamar urte musika taldea sortu zela, eta hiru urteko ibilbidea izan du. 2017an Musker izeneko diskoa argitaratu ondotik, 2018an eman zuten azken kontzertua Oiartzunen bertan antolatutako Gazte Akelarrean. Hamargarren urteurrena bete berri duten une honetan, Retegik jakinarazi du Hatortxu Rockeko kontzertuaz gain beste emanaldi bat ere izango dela, Oiartzunen bertan.
Uztailaren 24tik 27ra ospatuko dute Hatortxu Rock jaialdia Lakuntzan. Abenduan Atarrabiako azken edizioa ospatu eta gero, uda honetan bere ibilbideari bukaera emango dio elkartasun jaialdiak. Horren harira, Autobus Magikoarekin batera, beste talde batzuen itzulera iragartzeko eguna du gaur jaialdiak. Goizean iragarri dute Buitraker talde iruindarraren kontzertua, eta arratsaldean Never Surrender talde arrasatearrarena.
