Aparkaleku berriak egokitu ditu udalak Iztietan
Ondartxoko hiltegiaren inguruko lanen eragina gutxitzeko egokitu dituzte aparkaleku berriak.
Eremua hesituta dago lanak egiteko. Ondartxoko hiltegiaren inguruko lanak direla eta arraun pabiloi berria eraikitzeko zenbait aparkaleku plaza okupatu behar izna dira aldi baterako. Hori horrela, eta herritarrei ahali eta eragozpen gutxien eragin asmoz, 18 aparkaleku berri egokitu ditu udalak Iztieta pasealekuan.
Lanek bost hilabete irautea aurreikusi du udalak, eta hortaz, aparkaleku horiek erabilgarri egongo dira 24 orduz denbora horretan zehar, “inguruko egoiliar eta erabiltzaileentzako alternatiba bat bermatzeko”.
Lanetarako kamioiek Iztietan ahalik eta gutxien eragin dezaten, Kamioiak Altzateko zubi berritik sartuko dira hiltegi ingurura, batez ere obren lehen fasean. Sarbide hori itxita egongo da beste edozein ibilgailurentzat. Herritarren laguntza eskertu du udala, eta dagoen seinaleztapena errespetatzeko eskatu du.
