Igandean hasiko dira Gaintxurizketako behin-behineko pasabidea eraikitzen
Bertako bizilagunek HITZAri esandakoaren arabera, Aste Santuaren inguruan izango da zabalik behin-behineko zubia. Aldundiak lau hilabetera zabaldu ditu lanak.
Urriaren 7an Gaintxurizketako bizilagunek egin zuten elkarretaratzearen irudia. Gaintxurizketako bizilagunen borrokaren emaitzak aste honetan dira egikaritzen hastekoak. Auzoa erdibitzen duen Gi-636 errepidea gurutzatzeko behin-behineko pasabidea egiteko lanak etzi (igandea) hasiko dira. «Hala konfirmatu digute Lezoko Udaletik, haiei aldundiak esandakoetan oinarrituta», azaldu du Asensio Viaña Kaxka auzotarrak. Aldamio egiturako pasabidea izango da lau hilabetez eraikiko dutena; 2026rako aurreikusi dute behin betiko oinezkoen zubia egina izatea. Atzo (osteguna) eta gaur artean ziren behin-behineko pasabidea egiten hastekoak. Gipuzkoako Foru Aldundiak gaur bertan (ostirala) konfirmatu du lanen hasiera iganderako aurreikusi dutela: 348.247 euroko kostua du aldamio egiturako zubia egiteak, eta 14 metroko luzera nahiz 5,5eko altuera izango ditu.
Zubia egitea, baina, ez da auzotarren segurtasunerako egingo den lan bakarra. Hala, Perrene eta Muebles Rey saltokiaren artean (inguru horretan ari dira eraikitzen zubia) oinezkoentzako pasabide segurua egingo du udalak, eta errepidearen beste aldean, Irunerako norabidean diren bi bideetako bat kendu, eta oinezkoentzako nahiz bizikletentzako bideak egingo dituzte. Gainera, inguru horretan ibilgailuei abiadura muga txikituko diete (orduko 70 kilometrora), eta Altamirako zubitik Gaintxurizketako kaskoraino, errepidearen bi bideak erdibitzen dituen marra jarraia bikoitza izango da.
«Bazen garaia», adierazi du Kaxkak. Auzokideek egindako azken mobilizazioen ondoren, erakundeek gaia «serio» hartu dutela adierazi du, «esandakoa betetzen ari dira behintzat». Alta, gaiaren jarraipen zehatza egingo dutela nabarmendu du, «eta gainera, auzoarentzako garrantzitsuak diren beste hainbat gai lantzen hasiko gara. Baditugu borrokatzeko motibo gehiago».
Lan paraleloak
Gi-636 gaineko behin-behineko pasabidea egitea aldundiaren eskumena bada ere, Lezoko Udalak ere baditu hainbat zeregin auzoarentzat ezinbesteko den mugikortasun azpiegitura osatze aldera. «Perrenetik Muebles Rey arteko oinezkoen pasabidea egiteko lizitazioa abian dugu. Gaur bukatuko da enpresek proposamenak aurkezteko epea, eta gure asmoa da hilaren 25eko gobernu batzordean lan horiek esleitzea», zehaztu du Mikel Arruti alkateak. Esleitu eta gutxira hasiko lirateke zubira iristeko bide segurua egiten.
Arrutik adierazi du pasabidetik Lanbarren aldera joateko ere bidea egingo dela, Salva enpresatik barrena beherantz joango dena. «Asmoa da garraio publikoa erabiltzen duten Lanbarreneko langileei nahiz han dauden merkataritza guneetara joaten direnei bide segurua eskaintzea», dio Arrutik.
Igandeko 22:00etan hasiko dituzte lanak, hala ziurtatu du aldundiak. Hala, Irunerako norabideko abiadura moteleko bidean segurtasun hesiak jarriko dira, eta hori egiteko, trafikoa semaforo bidez arautuko da. Behin segurtasun herri hori jarri ondoren, noranzko bakoitzerako bide bat izango da asteleheneko 06:00etatik aurrera. Gainera, lanek iraun bitartean.
