LGTBI+ komunitatearen errealitatea ezagutzeko, urrats bat gehiago
Online eta modu anonimoan betetzeko galdetegia zabaldu du udalak; LGTBI+ komunitatearen diagnostikoa osatzeko bidean tresna bat gehiago izan nahi du.
Pasaiako Udalak udalerriko LGTBI+ komunitateak duen errealitatea ezagutu lehen eskutik diagnostikoa osatu eta hortik baiatuta, kolektibo horren bizi baldintzak hobetuko dituen plangintza diseinatu eta neurriak hartzeko. Irailean abiatu zuen LGTBI+ errealitateak ezagutzeko lanketa udalak, eta ordutik, herritar asko izan dira prozesuarekin bat egin eta iritzia partekatu dutenak diagnostiko zehatza ontzeko. Laura Re Berdintasun zinegotziak hala nabarmendu du, eta testigantza horiek guztiak, “funtsezkoak” direla adierazi, “diagnostikoa ahalik eta borobilena izan dadin”.
Urrats bat gehiago egin du udalak diagnostiko hori osatzeko bidean eta anonimoa den online galdetegia erantzuteko aukera zabaldu du, “parte hartu nahi duen pasaitar ororen iritzi eta ikuspuntuak beste modu batean ere jaso ahal izateko”, azaldu du Berdintasun zinegotziak. Udalak sortu duen galdetegi hori erantzuteko azken eguna, martxoaren 15a izango da.
Udalak irailean abiatutako prozesuaren helburu nagusiak gogorarazi ditu Iñi Etxezarreta Eihera kooperatibako arduradunak. Pasaiako LGTBI+ komunitateak pairatzen dituen indarkeria fisiko eta sinbolikoak aztertzen eta identifikatzen ari dira azken hilabeteetan, eta horrekin batera, herriko LGTBI+ errealitateen argazki eta irakurketa zehatza egingo dute: “Bukaeran LGTBI+ pertsonen bizi baldintzak hobetuko dituzten ekintzak eta neurriak diseinatzea dugu helburua”.
Esan bezala, anonimoa da galdetegia eta udalaren webgunean bete daiteke (egin klik hemen).
