Akordioa lortu dute Sanmarkoseneko langileek
81 greba egunen ondotik lortu dute akordioa eta lanera itzuli dira jada protesta egiten ari ziren erizain laguntzaileak, "aldarrikapen gehienak lortuta".
GReba hasi dute sanmarkosene egoitzan. Akordioa lortu dute Sanmarkosenen. Hala jakinarazi dute ELA, LAB eta ESK sindikatuek, eta horrenbestez, 81 egun greban izan eta gero, eta sindikatuek zehaztu dutenez “aldarrikapen gehienak lortuta” lanean dira langileak berriro.
Errenteriako Sanmarkosene adinekoen egoitza Gureak enpresak kudeatzen du eta bertan 125 langile ari dira lanean, gehien-gehienak emakumeak. Azaroaren 18an hasi zuten greba, eta ordutik 81 egun bete dituzte borrokaldian, iazko urrian enpresak erizain laguntzaileei planteatutako lan baldintzen aldaketa baten harira, “euren lan eskubideak hobetzeko”.
Atzo sinatu zuten greba bukaerako akordioa Gipzukoako Lan Delegaritzan eta hiru sindikatuen babesa izan du. Sindikatuek eurek azaldu dutenaren arabera, langileen eskaera gehienak jaso dira, “kaleratzerik ez da izango, jardunaldi partziala duten langileek %60ko kontratuak izatetik %81etik gorako kontratuak izatera pasako dira, eta egutegiari dagokionean, eguneko lan txandetan erizain laguntzaile gehiagok lan egingo dute. Azken horrek lan kargak arinduko ditu eta urtean zehar librantza egun gehiago izango dituzte”.
Azken neurri horiek “oso positibotzat” jo dituzte hiru sindikatuek: “Sektorean bizi dituzten lan karga handiak leuntzeko, eta lan eta bizitza pertsonala uztartu ahal izateko positiboa da”. Lan baldintzen hobekuntzaz gain, egoiliarrei egunero ematen zaien zerbitzuaren kalitatea hobetuko dela erantsi dute.
Akordio “onak” lortzeko bidean ezinbestekoak jo dituzte “greba” eta “mobilizazioak”, “horrela berretsi da”, eta eskerrak eman dizkiete “bidaide” izan dituztenei: “Eskerrak eman nahi dizkiegu herriko pentsiodun, senide eta bestelako eragile sozialei”.
