Hamar urteko ibilbideak merezi duelako kontzertu bat
Hamar urte bete ditu EMKE Musika Bandaren zuzendari lanetan Alain Aierdi Gurpegik. Urteurren biribila, kontzertu batekin ospatuko du igandean.
Alain Aierdi EMKE Musika Bandaren zuzendaria, artxibo irudi batean. Hamar urte bete dira alain Aierdi Gurpegi EMKE Musika Bandaren zuzendari bideari ekin zionetik. Ezin zuen bestela egin, eta hamarkada hori kontzertu bidez ospatuko du datorren igandean, hilak 16. Errenteriako Musika Bandaren arduradunen hitzetan, “luxua” da Alain Aierdi eta Aitor Mitxelena bezalako bi zuzendari izatea, “baita gure taldearekiko bi zuzendariek erakutsi duten konpromisoa ere”. Izan ere EMKE Musika Bandak bi zuzendari ditu.
Koldo Mitxelena ikastetxean izango da emanaldia 12:30ean hasita. Kontzertu hunkigarria izango omen da, “aurtengoa bezalako denboraldi zorrotz baten atarikoa”. Musikagile garaikideen lanetan zehar egindako ibilbide musikala proposatuko die ikus-entzuleei Aierdik, Pablo Sorozabal eta Reveriano Soutullo klasikoak baztertu gabe. Hala, Pablo Sorozabalen Katiuskaren fantasia, Bert Appermonten Gullivers travels, Jakob de Haanen Ross Roy edo Jesus Arturo Marquezen Conga del fuego nuevo joko ditu bandak.
Emki Bandi Zirkus
Igandeko kontzertuaz gain, eskuartean duen beste proiektu bat ere izan du hizpide EMKEk: Emki Bandi Zirkus ikuskizuna. Aitor Mitxelena bandako beste zuzendaria ari da hura prestatzen. Agertokian, musika bandarekin batera, akrobatak, magoak, hezle, pailazoak…izango dira, “musikaren eta zirkuaren magia ikuskizun zirraragarrian”. Ez dute informazio gehiago zabaldu momentuz, baina bai eskerrak eman Aierdiri eta Mitxelenari, “Errenteriako Musika Bandaren zuzendaritzaren binomio artistikoari esker aurkez ditzakegun ikuskizun eta kontzertuak dira”.
