Ibilgailu klasikoekin hitzordua, larunbatean
Don Bosco Ibilaldiaren hamabosgarrena egingo dute larunbatean 110 ibilgailu klasikok. Errenteria-Oreretatik abiatuta Irunen bukatuko dute zeharkaldia parte hartzaileek Nafarroa eta Gipuzkoako errepideetan barrena ibilita.
Don Bosco Ibilaldia aurkeztu dute, hamabosgarrena.Imanol Saiz Gomez de Segura Don Bosco Ibilaldia egingo dute larunbatean hamabosgarrenez, aurtengoan, Gipuzkoa eta Nafarroako errepideetan barrena. Denera 110 auto klasikok hartuko dute parte bi modalitatetan banatuta, rally eta paseoan, eta 95,40 eta 76,31 kilometro egin beharko dituzte, hurrenez hurren. Lanbide heziketa ikastetxe publikoak eta RACVN Real Automovil Club Vasco Navarrok antolatu dute auto klasikoen ibilaldi hori.
Gaur aurkeztu dute ibilaldia Don Bosco ikastetxearen automozio departamentuan. Don Bosco Ibilaldiaren komunikazio saileko kidea eta Don Bosco ikastetxeko prentsa departamentuko kidea da Mario Garcia eta berak azaldu ditu xehe hamabosgarren ekitaldiaren barrukoak. Berehala agortu direla plazak esan du Garciak «izena emateko epea zabaldu eta ordu gutxira bete ziren». Horrek, ibilaldiaren «garrantzia» eta «erreferentzialtasuna» agerian jarri duen zalantzarik ez du.
Zehaztasun gehiago eman ditu Garciak, eta hala, azaldu du rally modalitatean lehiatuko direnen kasuan ez dutela antolatzaileek abiadura neurtuko, erregulartasuna baino. «Trafiko irekian lehiatuko dira, beste ibilgailuekin batera, roadbook-a emango diegu, paperezko GPSa eta abiadura marka jarriko diegu 30 edo 50 kilometro ordukoa. Bidean kontrol sekretuak jartzen ditugu, eta garrantzitsuena modu erregularrean gidatzea da». auto bakoitzean bi lagun joango dira, gidaria eta kopilotua.
Lehen ibilgailua 11:30ean abiatuko da Don Boscotik, eta 14:10ean iritsiko da helmugara, Irungo Urdanibia Park Hotel jatetxera. Bertan bazkalduko dute guztiek elkarrekin, sari banaketa egin aurretik. Ibilbide osoa ez dute jakinarazi, baina auto klasikoen ibilaldia ikusteko puntu eta ordu zehatz batzuk eman dituzte antolatzaileek. Ibilaldia hasi aurretik, 09:00etatik 11:30era ikusi ahalko dira 110 autoak Don Bosco ikastetxearen kanpoaldean. Beste puntuak, honakoak: Lezo eta Hondarribia arteko Jaizkibelgo gaina (12:00etatik 13:00etara); Lesaka eta Oiartzun arteko Aginako gaina (12:50-13:50); Oiartzun eta Irun arteko Ingelesaren Gazteluaren gaina (13.30-14:30). Auto klasiko horiek denak batera ikusteko azken aukera Urdanibia Park jatetxeko aparkalekua izango da, 14:10etik aurrera.
Auto klasikoen zaleek aukera paregabea izango dute hitzorduarekin bat egin duten ibilgailuekin gozatzeko. 1970eko hamarkada baino lehen matrikulatutako sei autok parte hartuko dute, 1970eko hamarkadako 40 autok, 1980ko hamarkadako 42k, eta 1990eko hamarkadako 21ek. Ibilgailu sorta zabala eta askotarikoa, klasiko ezagunetatik hasita: Seat 600, 127, 124, 1430 eta 1.500; Renault 4L, R8 eta R5; Cintroen 2CV eta DS Tiburon; edota miniak. Deportiboek ere ez dute hutsik egingo. Aurtengo ibilaldiko autorik zaharrena 1952ko 4/4 Renault bat da.
Autobus klasiko bat tartean
Auto klasikoak barra-barra beste urte batez, baina aurten berritasunik bada, Garciak azaldu duenez: «Autobus klasiko bat ikusteko aukera izango dugu Agabus Autobusen Lagunen Gipuzkoako Elkarteari esker. Autobus hori Don Boscon egongo da ikusgai automobil klasikoekin batera. Donostiako Tranbia Konpainian (Dbus) zerbitzua eman zuen 1980ko hamarkadan, eta bertan sartu eta haren gaineko azalpenak entzuteko aukera ere izango da».
Ibilaldiaz gain erakusketa ere antolatu du Don Boscok larunbaterako. Rallyen historian ezinbestekoa izan den Mitsubishi Lancer Evolution ibilgailuaren zenbait bertsiorekin onduko dute. Horrekin batera Ceinpro ikastetxearekin elkarlanean antolatzen duen kartel lehiaketara aurkeztutako lanen erakusketa ere egingo du Don Boscok; aurtengo ibilaldiaren kartela KC Reyes Ceinproko diseinu grafikoko ikasleak egina da.
Eskerrak eman ditu Garciak: «Volvo Auto Sueciari, antolakuntzari autoak uzteagatik; eta RACVNri furgoneta uzteagatik. Halaber, 50 pertsonatik gora ariko dira laguntzen eta horiei garabia, Lagunak tailerren asistentzia eta DYAren laguntza medikoa gehitu behar diegu».
Solasaldi birtuala interneten
jardunaldia biribiltzeko aurten ere solasaldi birtuala antolatu dute interneten. Automobilismoaren munduarekin lotutako pertsona baten hitzaldiarekin jartzen zioten ginga ekitaldiari Don Boscoko ekitaldi aretoan aurreko urteetan. 2022az geroztik solasaldi birtuala egin izan dute, eta aurten ere bide beretik egingo dute, aurrez grabatutako elkarrizketaren bidez. aurten, Luis Murguia elkarrizketatuko dute: “Ibilbide luzea du automobilismoaren eta motoziklismoaren munduan, modalitate eta alderdi guztietan: probetan parte hartzea, antoalatzaile, dakarrak, Rallyak, eco rallyak, motoziklismo probak…”. Bideoa hemen klik eginda ikus daiteke.
Ondoko bideoa, Imanol Saiz Gomez de Segurak egin du.
