Joan den astean Pasaiako portuan istripua izan zuen garraiolaria hil da
48 urteko andoaindarra da hildako garraiolaria. Ostiralean salaketa elkarretaratzea egingo dute portuaren sarreran.
Pasaiako portuko artxiboko irudia. LAB sindikatuak jakinarazi du joan den astean garraiolari batek istripu ez traumatikoa izan zuela Pasaiako portuan kargatzen ari zela, eta hil egin dela. Andoaingoa zen 48 urteko garraiolaria. Lan istripua salatzeko elkarretaratzea egingo dute hilaren 14an (ostirala) 11:30ean portuaren sarreran (Lezoko biribilgunean), lan osasuneko intersindikala osatzen duten sindikatuek deituta (LAB, ESK, STEILAS, EHNE Etxalde eta Hiru).
LABek adierazi du garraiolarien artean heriotza ez traumatikoak, beste sektoreetan baino ohikoagoak direla, “sektorean ematen diren bizi baldintzak tarteko”. Garraiolarien alorrean “baldintza gero eta gogorragoak” direla azaldu du sindikatuak, eta horren eragina datuetara eraman du: iaz, hamalau garraiolari hil ziren lan istripuan; 2023an, hamar. “Oso prekarioak dira garraioaren sektoreko lan-baldintzak: lanaldi luzeak, estresa, presioak, garraioagatik ordaintzen duten prezio baxua, bizitza eta elikadura osasuntsua izateko zailtasunak, eta abar. Baina argi diogu garraioaren sektorean gertatzen diren lan-istripu gehienak guztiz ekidin daitezkeela, eta horretarako borondate politikoa baino ez dela behar, baita erakunde publiko eta enpresa guztien inplikazioa ere, garraiolarien lan-eskubideak bermatzeko eta errespetatzeko neurriak hartzeko”, azaldu du LABek.
Horren harira, prekarietatearekin bukatzea galdegin du sindikatu abertzaleak, “patronalaren inpunitatearekin bukatu behar da”. Bide horretan erakundeek ezin dutela beste alde batera begiratu azaldu du sindikatuak, “bestela gertatutakoaren eta gertatuko denaren konplize izango dira”. LABek deitoratu du 2008tik ez dela berritu Gipuzkoan zein Nafarroan sektore horretako hitzarmena, eta horrek eragin zuzena duela garraiolarien laneko osasunean.
