Moda pasarela bilakatuko da Agustinak Zentroa
Irungo Mendibil Formazio Zentroko Jantzigintza eta Modako ikasleek kapsula bilduma aurkeztuko dute bertan, hilaren 20an.
Moda pasarela bilakatuko da Agustinak Zentroa hilaren 20an, osteguna. Izan ere, Mendibil Formazio Zentroko Jantzigintza eta Modako bigarren zikloko ikasleek kapsula bilduma aurkeztuko dute bertan, 17:30ean hasita. Ekitaldia, publikoari irekia da. Ikasle bakoitzak, bere kapsula bildumako bi modelo aurkeztuko ditu desfilearen barruan. Mendibil Formazio Zentroa eskertuta azaldu da Agustinak Zentroarekin, “espazio zoragarria utzi digu desfilea egiteko, sektorearen lankidetza eta garapena bultzatuz”.
Erakutsiko dituzten jantzien oinarrian, urbanstyle, antzerki moda, eta modaren esentzia. Iraunkortasuna eta egungo joerak ere aintzat hartru dituzte ikasleek kapsula bilduma horretako diseinuak eta modeloak sortzerakoan. Hilabeteetako lana dago atzean, arduradunek azaldu dutenez, “lan horren eta irakaskuntzaren emaitza da ekitaldi hau. Ikasleek euren bildumak garatu dituzte, joerak esploratu eta jantzigintza teknika aurreratuak erabili”.
Desfileaz gain, modeloak makillatzeaz arduratzen den As Artist makillaje akademiak ere hartuko du parte ekitaldian, eta egunean zehar, diseinuen desfilea egingo da musikarekin eta lanen erakusketarekin.
Moda “adierazteko eta sortzeko” modu bat dela eta ikasleek “aparteko talentua” erakutsi dutela prozesuan zehar nabarmen jarri du Marian Irastorza, Jantzigintza arloko Mendibil Zentroko tutoreak. Harago jo du Leire Jeronimo ikastetxe bereko patroigintza, moda eta joeren tutoreak: “ekitaldi hau ez da soilik ikasleen lana erakusteko plataforma izango, mundu profesionalarekin konektatzeko aukera bat ere izango da”.
Sarrera librea da eta publikoari irekia, “”komunitatearen artean diseinuarekiko eta jantzigintzarekiko interesa sustatzeko helburuarekin”.
