«Oso berezia da niretzat Realaren kontra jokatzea»
Gogortza Realaren arerio izango da Europa Ligako final hamaseirenetako kanporaketan. 18 urteko gaztea Danimarkan jaio zen, baina familia Errenteria-Oreretakoa da.
Atzo Europa Ligako final hamaseirenetako joaneko partida jokatu zuten Midtjylland talde danimarkarrak eta Realak. Danimarkako taldean Mikel Johan Gogortzak jokatzen du. 18 urteko gaztea Danimarkan jaio zen, baina haren familia Errenteria-Oreretakoa da. Oso presente du bere jatorria, eta onartu du Realaren kontra aritzea berezia dela. [Elkarrizketa asteazkenean bidali zen inprentara].
Zure familia jatorriz euskalduna izanda, berezia da zuretzat Realaren kontra jokatzea?
Bai, oso berezia da niretzat Realaren kontra jokatzea. Nire aita euskalduna da, familia Errenteria-Oreretakoa da, eta oso berezia izango da Euskal Herriko talde handienetako baten kontra jokatzea. Euskal Herrira itzuliko naiz eta familia bisitatu ahal izango dut.
Euskal Herrian izan zarela esan duzu. Gustatzen zaizu? Baduzu loturarik Euskal Herriarekin?
Errenteria-Oreretan bitan izan naiz familia bisitatzen, aitaren familia han bizi baita. Lehengusu asko dauzkagu, eta kontaktua mantentzen dugu haiekin. Onartu behar dut Euskal Herria asko gustatzen zaidala. Natura edota eguraldia ikaragarriak dira. Han izan nintzen azken aldian patata tortilla eta janari on asko jateko aukera ere izan nuen.
Lehiari helduta, zer-nolako kanporaketa espero duzu Realaren kontra?
Oso kanporaketa gogorra izango da guretzat. Reala oso talde on eta handia da, eta ziurrenik haiek dira faboritoak kanporaketa irabazteko. Hala ere, gauzak zailtzeko jokalariak dauzkagu, oso jokalari fisikoak baititugu, intentsitate handiarekin jokatzen dutenak. Hori Realarentzat zaila izan daiteke. Reala da faboritoa, baina sinisten dut partida irabazi eta hurrengo kanporaketan izan gaitezkeela.
Hemen ezer gutxi dakigu zuen taldearen inguruan. Zer-nolako taldea da Midtjylland?
Talde indartsua eta fisikoa gara, joko zuzena jokatzen duena. Arlo pertsonalean oso jokalari onak dauzkagu, Realeko atzelariei gauzak zailtzeko gai direnak. Uste dut talde ona garela eta erakutsi dugula aurtengo Europa Ligan.
Nola definituko zenuke Reala?
Reala oso talde ona da. Txikitatik ikusi ditut haien partidak, konexio handia izan baitut euskal taldeekin. Realak oso jokalari onak dauzka, baloiarekin oso ondo moldatzen direnak, eta partida zaila aurreikusten dugu.
Danimarkako Ligan berdinduta zaudete lehen postuan Kopenhagerekin, eta Europa Ligan final hamaseirenetako kanporaketa jokatuko duzue Realaren kontra. Nola doakizue sasoia?
Danimarkako Liga irabazten saiatuko gara, eta momentu honetan berdinduta gaude lehen postuan den Kopenhagerekin. Denboraldia bikaina izaten ari da. Europa Ligan aurrera egiten saiatuko gara. Badakigu ez garela faboritoak, baina gure onena emango dugu aurrera egin ahal izateko.
Arlo pertsonalean nola doakizu?
Soilik 18 urte dauzkat, eta ahalik eta gehien jokatzen saiatzen naiz. Europa Ligako azken partidetan, esaterako, minutuak pilatu ditut. Nire onena ematen ari naiz ahalik eta gehien jokatzeko.
Zein helburu pertsonal eta kolektibo dituzu aurtengo denboraldirako?
Arlo pertsonalean, lehen esan bezala, minutuak pilatu behar ditut. Ahalik eta gehien jokatu behar dut, golak sartzen eta asistentziak ematen. Arlo kolektiboan, aldiz, Europa Ligan ahalik eta urrunen iristen saiatuko gara, eta liga geureganatu nahi dugu.
Gaztea zara, soilik 18 urte dauzkazu, baina Midtjyllandeko lehen taldean ari zara jokatzen. Nolakoa izan da elitera iristeko bidea?
Bidea luzea izan da. Hiru urterekin hasi nintzen futbola praktikatzen, eta beti gogor saiatu naiz jokatu dudan talde guztietan. Midtjyllandek niregatik apustua egin zuen lehen taldera iristeko, eta hemen nago.
Zer motatako jokalaria zara?
Aurrelaria naiz, eta hegaletik jokatzen dut. Indartsua naiz, driblatzea gustuko dut, eta taldekideekin kontaktuan egotea gustatzen zait, asistentziak emateko eta golak sartzeko.
Nola hasi zinen futbolean? Nondik datorkizu zaletasuna?
Futbolarekiko zaletasuna nire aitarengandik datorkit. Aitari asko gustatzen zaio futbola, eta kirol hori oso presente egon da beti familian. Oroitzapena dudanetik gustatu izan zait futbola.
Baduzu ametsik futbolean?
Europako talde handienetan jokatzea eta Txapeldunen Liga jokatzea ditut amets.
Etorkizunean gustatuko litzaizuke talde euskaldunen batean jokatzea?
Bai. Euskal Herriko bi talde handienetako batean jokatzea ikaragarria litzateke.
