Zendutako garraiolariaren heriotza salatu dute
Asteazkenean 48 urteko garraiolari bat hil zen Pasaiako portuan kamioia kargatzen ari zela, bihotzekoak jota. LAB, ESK, STEILAS, Hiru eta EHNE sindikatuek langile horren heriotza salatu dute gaur.
LAB, ESK, STEILAS, Hiru eta EHNE sindikatuak Pasaiako portuko sarreran elkartu dira gaur goizean asteazkenean zendutako garraiolariaren heriotza salatzeko. Langilea bihotzekoak jota zendu da, 48 urterekin. Iragan astean izan zuen ezbeharra garraiolari andoaindarrak, baina asteazkenean hil zen. Patronalak eta instituzioek gaixotu eta hiltzen gaituzte lelopean egin dute protesta. Sindikatuek salatu dute “lan baldintza kaskarrak” daudela heriotza horren atzean.
Euskal errepideetan zendutako urteko lehen garraiolaria izan da. Iaz 14 garraiolari zendu ziren, hortaz, hilero gutxienez garraiolari bat hiltzen da batez beste Euskal Herrian. Asteazkenean zendutako garraiolariak portuan kamioia kargatzen ari zela jasan zuen bihotzekoa. Langile horren lankideek salatu dute Pasaiako portuan ez dagoela anbulantziarik, eta asistentzia iritsi zenerako beranduegi zela. Garraiolaria gaizki sentitzen hasi zela esan dute sindikatuek, eta konorterik gabe lurrera erori zen. Bitan bihotza suspertzen ahalegindu arren, erietxera larri iritsi zen, eta asteazkenean zendu zen.
Sindikatuek baietsi dute garraioaren sektorean bihotzeko arazoen kopurua handia dela. Horrez gain, garraiolari horien adinean ere jarri dute arreta. Sindikatuek zehaztu dute iaz hil ziren 14 garraiolarietatik gehienak jubilatzeko adinetik oso gertu zeudela. Hori dela eta, Hiru sindikatuak bi aldarrikapen historiko ditu: alde batetik, erretiroa 60 urtera aurreratzea; eta, bestetik, garraiolarien gaitz kardiobaskularren kopuru, ondorio eta eragin handia aintzat hartu beharko litzatekeela lan osasun eta prebentzio betebeharrak eta arauak finkatzerakoan. “Azken finean lan jardunaldi luze eta estuen edota enpresek eragindako presa eta presioen ondorio dira gertaera tamalgarri hauek”, esan dute.
