Iritsi da automobil klasiko zaleen egun handia
Don Bosco Ibilaldiaren hamabosgarren edizioa egiten ari dira eta goizean autoak ikustera gerturatu dira zaleak ikastetxera. Bigarren geldialdia Irunen egingo dute, 14:10ean.
Iritsi da auto klasiko zaleen egun handia, Don Bosco Ibilaldiaren hamabosgarren edizioa egiten ari baitira. Goizean zehar giro ezin hobea sortu dute ikastetxearen aparkalekuetan, eta bertaratu direnek, 110 ibilgailu klasiko eta Agabus Autobus Lagunen Gipuzkoako Elkartearen autobus klasiko bat ikusteko ohorea izan dute.
Mitsubishiren erakusketa eta Ceinproren kartel erakusketa ere jarri dituzte. Gerturatu direnen artean ikasle ohi asko egon dira, egun ikaskide izandakoekin, irakasleekin eta lagunekin pasatuz. Halaber, nostalgiko jarri eta prestakuntza jaso zuten instalazioak bisitatu dituzte.
Eguzkia lagun izateaz gain, sabela betetzeko pintxoak eta kafea eskaintzen egon dira ikasle eta irakasleak. Goizeko orduak aurrera joan ahala, motor hotsak entzuten dira, ibilaldia hastera doala abisatzeko. Bi modalitatetan ari dira parte hartzen autoak, rally paseoan eta 95,40 eta 76,31 kilometrokoetan.
Nafarroa eta Gipuzkoako errepideetan (Errenteria-Orereta, Oiartzun, Lesaka eta Irun) barna ibiltzen ari dira, eta irteerak 11:30ean hasi dituzte. Automobilak ikusteko aukera galdu duenak, beste zenbait paradatara gertura daiteke. Esate baterako, bazkaltzeko geldituko dira Irungo Urdanibia Park hotel jatetxean (14:10ean), baina kotxeak mugimenduan ikusi nahi dituenak honako leku eta orduetan egon beharko du: Lezo eta Hondarribia arteko Jaizkibelgo gaina (12:00etatik 13:00etara); Lesaka eta Oiartzun arteko Aginako gaina (12:50-13:50); eta Oiartzun eta Irun arteko Ingelesaren Gazteluaren gaina (13:30-14:30).
Ibilgailuen artean garai eta modelo ezberdinak topa daitezke. 1970eko hamarkada baino lehen matrikulatutako sei autok parte hartuko dute, 1970eko hamarkadako 40 autok, 1980ko hamarkadako 42k, eta 1990eko hamarkadako 21ek. Kotxe modeloei dagokienez, Seat 600, 127, 1.430 eta 1.500; Renault 4L, R( eta R5; Citroen 2CV eta DS Tiburun; edota miniak. Deportiboen artean ibilgailurik zaharrena 1952ko 4/4 Renault dago.
