Antzerkiak batuko ditu Haurtzaro Ikastola eta Petra Lekuona
Hilaren 19an eta 21ean egingo dituzte emanaldiak Haurtzaro Ikastolako haurrek. Lehen hitzorduan haurrak joango dira Petra Lekuonara.
Petra Lekuona. Asteazkenean –hilak 19– Haurtzaro Ikastolako HH 5 urteko ikasleak Petra Lekuonan izango dira bertako erabiltzaileei bisita egiten eta, bide batez, antzerki bat egiten. Bertan sortzen dena “bereziki interesgarria” izateaz gain, Ihoteetan murgiltzeko ekintza izaten dela aurreratu dute antolatzaileek.
Era berean, jakinarazi dute hilaren 21ean Petra Lekuonakoak ikastolara bertara joango direla bigarren antzerki emanaldi bat ikustera.
Oiartzungo Ihoteak du izena antzelanak, eta bost urteko haurrek, oiartzueraz, intxixu, basandre eta sorginek Kataxulotik herrira egiten duten ibilbidearen berri emango diete Petra Lekuonakoei eta lau urteko haurrei. Saioan, dantza eta kantua izango dira nagusi. “Guztion artean herri izaera aberastuz goaz, herriko kondairak ikastolara ekarriz eta ikastolatik herriari proiektu berriak eskainiz”, diote Haurtzarokoek.
