Xoxolur, Oiartzundik Errenteria-Oreretara
Igandean Oiartzungo Elorrietako gaina egin zuten Lezoko mendizaleek. Martxoaren 16an Errenteria-Oreretako eskolartekoan izango dira.
Igandean egin zuen Lezoko Xoxolur Mendi Klubai sasoiko bosgarren irteera. Lezon gelditu, garraio publiko bidez Oiartzun aldera joan, eta herrigunetik Elorrietako kaskoa (398 metro) bere egitera joan ziren. Eguraldi aparta egin zuen igandean, asko gozatu zuten han izan ziren 30 lezoarrek mendiaz, giroaz, lagunarteaz eta eskualdeaz. Euskaraz. Ondoko irudiak horren erakusle dira, Xoxolurrekoek bidalitakoak.
Oiartzundik, Errenteria-Oreretara. Xoxolurreko kideek Lezorekin mugakide den herrira egingo dute jauzia martxoaren 16an. Izan ere, han da jokatzekoa Eskolarteko XXXVII. Mendi Lehiaketako ibilbide neurtuetako bat, zehazki Oarsoaldeari eta Bidasoari dagokiona. Errenteria-Oreretakoaz aparte, Añorgan, Orion, Ormaiztegin eta Bergaran ere egingo dituzte herrialdeko martxa neurtuak, gazteenei begirakoak, eta Gipuzkoako Mendi Federazioaren aterkipean antolatutakoak.
Errenteria-Oreretako ibilbide neurtuaren kasuan bi ibilbideren arteko aukera egin dezakete hala nahi dutenek, 10,5 kilometrokoa bat (luzea) eta 8 bat kilometrokoa bestea (motza); biak ala biak martxoaren 16ko 09:30ean abiatuko dira Koldo Mitxelena plazatik. Horren informazio gehiago izateko, baliatu esteka hau.
