Haur eta nerabeen eskeak eta nahiak entzun dituzte
Eskubidea planaren barruko bosgarren saio bateratua egin dute gaur herriko 100 haur eta nerabek, eta udal ordezkariek.
Eskubidean Planaren barruko bosgarren saio bateratua egin dute gaur Pasaiako hau eta nerabeek, nahiz udaleko hautetsi, teknikari, eta udal zerbitzuetako langileek. Herriko hiru ikastetxeetako (Pasaia-Lezo Lizeoa, Karmengo Ama eta La Anunciata) 10-16 adin tarteko 100 ikaslek parte hartu dute, eta euren kezkak eta beharrak udal ordezkariei helarazteaz gain, ikasturtean zehar lantzen ari diren hainbat proposamen azaldu dituzte. Udal ordezkariek erantzunak eta azalpenak itzuli dizkiete.
Hasteko, solasaldi formatuan, hiru ikastetxeetako kideek landu dituzten proposamenen azalpenak eman dituzte irudi eta mapa bidez. Udal ordezkariek proposamen horien artean zeintzuk eta nola bideratuko diren esan diete ordainean. Te Alberro alkateak eman dizkie xehetasunak: “Ikasturte honetan zehar ikastetxeetan egin dituzten proposamen, ekarpen, kexa eta zalantzak jaso ditugu, eta baita aztertu ere. Horietako asko martxan daude, beste batzuk egingarritzat jo ditugu epe labur-ertainera, eta gutxi batzuk udaletik bideratzeko zailak dira. Horien inguruan hitz egingo dugu; bizipenak elkarbanatu eta elkarri entzungo diogu, eta horregatik da hain garrantzitsua urteroko topagune hau guretzat”.
Laura Ré Parte Hartze zinegotziaren ustez, herriko haur eta gazteekin harremana izatea haien iritzia kontuan hartzeko bidea da: “Ekarpenetan jasotako kezketako asko zuzenki lotuta daude garatzen ari garen zenbait parte hartze prozesurekin. Eskubidean planak aukera ematen digu haur eta nerabeen iritzia kontuan hartzeko udal politikak garatzeko garaian, eta, horrez gain, ahalegintzen ari gara beste espazio batzuk ere zabaltzen haien ekarpenak helarazteko udalera; adibidez, gaur etorri diren askok parte hartu zuten Antxoko Gure Zumardia diseinatzeko parte-hartze prozesuan adingabeekin egin genuen saio espezifikoan”.
Galde-eskeen eta azalpenen zatia bukatuta, arinago joan da topaketa. Hamaiketakoa egin dute, eta indarrak berreskuratuta, aurretiaz egindako izen-emate galdetegian aukeraturiko gaiaren arabera hiru talde sortu dira, ondorengo galderei buruz hausnartzeko: Nola egin diezaiekegu leku gehiago egunerokoan sexu eta jatorri aniztasuna duten pertsonei ,bizikidetzaren alde?; Nola mugitzen gara herrian? Nola joaten gara eskolara?; Nola bizi ditugu haur eta nerabeentzako espazioak (kirol espazioak, liburutegiak…)?
Saioaren balorazio orokorra egiteko murala osatu dute bukatzeko. Pertsona bakoitzak hautatu du balorazioaren araberako kolore bat eta bere eskuaren marka utzi du muralean, talde argazkia egin aurretik.
Ondokoak, gaurko topaketaren hainbat irudi dira, Pasaiako Udalak HITZAra bidalitakoak.
