Trafiko eta garraioan aldaketak, Ane Santesteban Txirrindulari Sariaren harira
Igandean izango da lasterketa eta 09:00etatik 14:00etara trafikoa eta garraio publikoari eragingo dio Gaztela Mantxako biribilgunetik Lartzabalgo biribilguneraino.
OTXEko emakumeak eta Leire Mazizior Kirol zinegotzia lasterketa aurkezpenean. Ane Santesteban txirrindularitza proba jokatuko dute igandean—hilak 23— goizetik eguerdira, eta hori horrela, ondorioak izango ditu trafikoan zein garraio publikoan. Zirkulazio mozketa puntualak izango dira denbora tarte horretan Gaztela Mantxako biribilgunetik (Renfe) Lartzabalgo biribilguneraino. Beharrezkoak ez diren itxaronaldiak ekiditeko ordutegia kontuan hartu eta Nafarroa hiribidearen ordezko bideak erabil ditzatela joan etorrietan. Horren ordez, Gi-636 errepidea eta erdialdeko kaleak erabil ditzakete auzoetara heltzeko.
Nafarroa etorbidean eta eragindako eremu horretan dauden garajeetan aparkatzen dutenek kasu horietan erabili ohi diren sarbideak erabili beharko dituzte.
Garraio publikoari dagokionean U7 hiri barruko linearen Aiako Harriko (Galtzaraborda kiroldegia), Galizia biribilguneko eta Zumardiko geralekuak, bertan behera geldituko dira 09:00etatik 14:00etara, gutxi gorabehera.
E01, E02, E03, eta E27 hiriarteko lineen Zumardiko, Gabierrotako eta Lartzabalgo geralekuak ere bertan behera geldituko dira 09:00etatik 14:00etara, gutxi gorabehera.
