Azken fasean dira Beraun kalea berritzeko lanak
Horien xedea da espaloiak handitu, bidegorria egokitu, eta ibilgailuen abiadura moteltzea oinezkoen mugikortasuna seguruagoa izateko.
Beraun kale osoa biziberritzeko lanen hirugarren eta azken faseari ekin dio Errenteriako Udalak aste honetan. Horien xedea da espaloiak handitu, bidegorria egokitu, eta ibilgailuen abiadura moteltzea oinezkoen mugikortasuna seguruago bihurtzeko. Horiek egikaritzeko epearen berri eman du udalak: aurtengo azken hiruhilekoa.
Kalearen beheko aldean hasi dira hirugarren eta azken fase honetako lanekin, eta Luis Mariano plazaren pareraino iritsiko dira. Han, igogailuekin lotuko dituzte espaloian nahiz bidegorrian. egindako hobekuntzak. Lanen ondorioz, aparkatzeko hainbat plaza ezabatuko dira, “plazen murrizte hori ahalik eta txikiena izan dadin antolatuko dira obrak”, adierazi du udalak. hango ikastetxearen eta kaleko 1. zenbakiaren arteko irisgarritasuna hobetzearekin batera bukatutzat emango dituzte lanak. 800.000 euroko aurrekontua dute azken fase honetako lanek.
Kale osoa biziberritzeko lanen barruko lehen fasean 63 ibilgailurentzako aparkaleku berri bat sortu zen, Pontikako aparkaleku berriaren osagarri, eta horrek plazak sortzea ahalbidetu zuen. Halaber, txakurrentzako parkea birkokatu zen, eta espazio berde bat libratu eta egokitu zen. “Horri esker, haurrentzako eta helduentzako jolasak jarri ahal izango dira”, zehaztu du udalak.
Bigarren fasean, berriz, oinezkoentzako bi plaza berri sortu ziren 5. eta 15. zenbakien artean, 1.500 metro koadro baino gehiagoko azalerarekin, eta horietan haurrentzako jolas berriak jarri ziren. Azaleraren herena baino gehiago landarez estalita dago. Autobidearen azpiko tunelean ere esku hartu zuten, seguruagoa eta ibilgarriagoa egiteko. Pontika ondoko aparkalekuen eraikina eraikitzearekin batera, Beraun kalearen beheko aldearen zati handi bat ere urbanizatu zen.Fase horretan, saneamendu- eta euri-uren sarean ere esku-hartze garrantzitsuak egin ziren.
“Hirugarren fasea amaitzearekin batera, proiektu anbiziotsu hau bukatutzat emango da. Proiektu honek hobekuntza handia ekarri du egoteko espazioetan, oinezkoen segurtasunean eta irisgarritasunean; azken batean, hiri-ingurune hau bizigarriagoa egin du”, esan du udalak.
