Etxebizitza turistikoetarako lizentzia berririk ez du emango udalak
Etxebizitza turistikoei lizentzia berriak etetea onartu du udalbatzak, PP ez beste udal talde guztien babesarekin. Gipuzkoako aldizkari Ofizialean argitaratu bezain laster jarriko da indarrean.
Aizpea Otaegi eta Eneko del Amo gaurko agerraldian. Etxebizitza turistikoetarako lizentzia berririk ez du emango Errenteriako Udalak. Hala erabaki zuen atzo plenoak, PP ez beste alderdi politiko guztien babesarekin. Neurri hori Gipouzkoako Aldizkari ofizialean argitaratu bezain pronto jarriko da indarrean, egun batzuen buruan izango dela aurreikusi du udalak. Erabakiaren zehaztapen guztiak eman dituzte gaur Aizpea Otaegi Errenteriako alkateak eta Eneko del Amo Hirigintza zinegotziak egin duten agerraldian.
Etxebizitza turistiko gutxi direla udalerrian zehaztu du Otaegik, 30 bat dira gaur-gaurkoz, baina batez ere hazkundea azken urtean sumatu dutela. Hori horrela, gorakada horretatik abiatu dute lizentzia berriak ematea eteteko iniziatiba. Aipamen berezia egin dio alkateak gaia testuinguratzeko, Donostiak udalerriarengan duen eraginari, izan ere uste baitute zerikusia izan dezakeela iazko gorakada horrek Donostiako Udalak egin duen arauketarekin. Errenteriako Udalak hartutako erabakiarekin 30 etxe turistikoen kopuru hori izoztu egingo da, oraingoz.
Neurriaren atzean, jarduera turistiko horiek ugaritzeak herritarren artean sortzen duen kezkari erantzutea dago batetik alkateak adierazi duenez, baina baita etxebizitzaren bizitegi erabilera lehenesteko irizpidea ere, bestetik. Aitortu du halaber, etxebizitza turistikoen erregularizaziori buruz udalean jasotako kontsultak eta eskaerak ugaritu egin direla azken urtean: “Badakigu lege modifikazioa egin dela urtarrilean jabetza horizontalaren ingurukoa, baita ere etxebizitza edo alojamendu turistikoena berme juridiko handiagoarekin erregulatzera datorrena. Hain justu, bizilagunen baimena beharko dute alojamendu turistiko bat jarri nahi dutenek aurrera egin ahal izateko. Uste dugu, edozein kasutan, lizentziak ematea etetea neurri erabakigarriagoa edo zorrotzagoa dela”. 2017an lau etxebizitza turistiko ziren Errenteria-Oreretan, gaur egun 30 dira, del Amok zehaztu duenez, “azken urtean horien erdia, hamabost bat etxebizitza turistikok eskatu dute lizentzia”.
Moratoriaz hitz egin du Otaegik, aldi baterako delako hartu berri duten neurria, eta horren arrazoia azaldu du: “Hain justu HAPO Hiri Antolamendurako Plan Orokorra berritzeko prozesuan murgilduta gaude, eta hurrengo plan orokorrak berak arautuko du ondo gai hau datozen urteetarako. Bitartean plan orokorraren prozesuak berak ahalbidetzen digu behin-behineko neurri hau hartzea”. Hartutako neurriak bete-betean egiten duela bat udalak zabaldutako bidearekin sinistuta azaldu da, gainera, alkatea, “eremu tentsionatu izendapenarekin aktibatzen ari den alokairua izozteko neurria indartzera dator moratoria. Aldi berean, etxebizitza plan bat daukagu indarrean, horren garapenean ari gara, eta uste dugu etete honek gehitu egiten duela egiten ari garen neurrien zabaltze horretan”.
Etxebizitza turistikoei begira udalak neurri bereziak dituela indarrean ere aipatu du. Hala, jada martxan diren etxebizitza turistikoei %150eko OHZren errekargua ezarriko zaie, eta ekoizle handiei dagokien hondakinen tasa ordainduko dute aurtengo ordenantza fiskalen arabera, “izan ere etxebizitza horien erabilera ez da erresidentziala, jarduera ekonomiko gisa jotzen ditugu horregatik aplikatzen zaie errekargua eta hondakin zerga berezia”.
Oarsoaldea eta Bidasoan, Errenteria-Oreretaz gain, Oiartzunek bakarrik hartu du antzeko erabakia eta moratoria ezarri etxebizitza turistiko berrien lizentzien baimentzea eteteko.
