Haritzak landatzeko hitzordua, martxoaren 16an
Zuhaitz Eguna martxoaren 16an –igandea– izango da aurtengoan. Pilotasorora joango dira oiartzuarrak haritzak landatzera.
Oiartzungo Udalak jakitera eman duenez, martxoaren 16an egingo dute Zuhaitz Eguna, udaberri atarian. Haurtzaro Ikastolako atarian elkartuko dira 10:00etan Pilotasorora joango direnak, bertan hartuko baitute autobusa. Doakoa izango da autobusa, eta izen ematea martxoaren 12a baino lehen egin behar da. Hala ere, oinez joateko aukera ere badu nahi duenak; horiek 10:30ean elkartuko dira.
Pilotasoron haritzak landatuko dituzte “ingurumenarekiko konpromisoa sustatzeko”. Landaketa egin ondoren hamaiketakoa izango dute bertaratutakoek. 12:00etan egingo dute itzulera.
Antolatzaileek zehaztu dutenez, ekitaldia familian gozatzeko modukoa izango da, etxeko txikiek naturarekiko ardura lantzeko eta basoen garrantziaz jabetzeko aukera izango baitute.
