Plaza bat, liburutegiko txokoa, kirola eta aldarria Lezoko Martxoaren 8an
Herriko hainbat eragilek elkarlanean antolatu dituzte Emakumeen Nazioarteko Egunaren harirako ekitaldiak.
2024ko Martxoaren 8ko mobilizazioa Lezon. Edukiz eta ekitaldiz beteta datoz Lezoko Martxoaren 8aren gaineko ekitaldiak. Emakumeen Nazioarteko Egunaren harirako ekitaldiak, egun seinalatutik askoz harago joango dira aurtengoan ere. Horietako bik arrasto iraunkorra utziko dute herrian: Miren Gezala parkea izango du Lezok aurrerantzean, eta gainera, Andreone Udal Liburutegian Txoko Feminista jarriko dute. Beheko koadroan daude egitarauaren xehetasunak.
Elkarlana. Emakumeen Egunerako herriko hainbat eragile antolatu eta bildu dira egitaraua osatzeko. Iruntzen Lezoko Emakumeen Taldea, Gaxuxa Emakume Elkartea, Arkirun pilota eskola, Faktoria, Txirbilla aisialdi taldea. Emakume Korrikalarien Taldea, Murixka dantza taldea, Tomas Garbizu Musika Eskola, Piztu Lezo eta Lezoko Udala dira ekitaldien zerrenda mamitsu horren erantzule.
Kirola, kultura, aldarria… Denetik da Martxoaren 8aren barruko egitarauan. Alta, herriko kale izendegian emakumeen izena-abizenek tokia izan dezaten adostu den proiektua izan daiteke ekitaldietatik esanguratsuena: Aralar kaleko etxebizitza berrietako parkea, Miren Gezala parkea izango da aurrerantzean. Miren Gezala Sagarzazuk (Lezo 1912-Oiartzun 2003) Lezoko lehen ikastola abiatu zuen plazan, bertako irakasle izan zen. Helduei ere eman euskara eskolak eman zizkien. Gainera, herriko kulturarekin atxikimendu handia izan zuen, dantzaria eta aktorea ere izan zelako, besteak beste. 1936ko gerra hastean, familiarekin Ipar Euskal Herrira erbesteratu zen, eta 1950an itzuli zen Hego Euskal Herrira. Haren biografia osoa ikusteko baliatu esteka hau.
Lezo. Martxoaren 8ko ekitaldien zerrenda.
Martxoak 6, osteguna
- 18:30ean, Koldobike Gezala pilotalekuan, Emakumeen Esku Pilota Txapelketaren finalerdiak
Martxoak 7, ostirala
- 21:30ean, Ibaiondon, bertso afari feminista Aissa Intxausti eta Miren Artetxe bertsolariekin. Sarrerak agortu egin dira.
Martxoak 8, larunbata. Emakumeen Nazioarteko Eguna
- 10:00etan, Gurutze Santuaren plazan, emakume korrikalarien topaketa eta nordic walking martxaren hasiera.
- 10:30ean, Gurutze Santuaren plazan, emakume korrikalarien irteera 5 kilometroko ibilbidea egiteko.
- 12:30. Manifestazioa Gurutze Santuaren plazatik abiatuta. Bidean, Miren Gezala plazaren izendapena egiteko ekitaldia egingo da; bukaeran, Sutargi abesbatzaren eta Murixka Dantza Taldearen emanaldia.
- Ondoren. Karlos Saldise plazan, brindisa eta mokadutxoa jateko aukera.
- 17:30ean, Koldobike Gezala pilotalekuan, Emakumeen Esku Pilota Txapelketaren finala.
Martxoak 9, igandea
- 19:30ean, Gezala Auditoriumean, De Ste Xeito Galiziako konpainiaren Feminissimas antzezlana.
Martxoak 15, larunbata
- 19:00etan, Gezala Auditoriumean, zineforuma.
Martxoak 28, ostirala
- 19:00etan, Andreone Udal Liburutegian, Txoko Feministaren aurkezpena.
