Udalak doako lau yoga saio eskainiko ditu
Pasaiako ikasleek egin dute proposamena, eta udalak hura egikaritzea erabaki du. Yoga ikastaroak martxoaren 10etik 18ra bitartean izango dira, Antxon, adin tarte guztiei begirakoak.
Pasaiako Udalak, Eskubideen programaren bidez, haur eta nerabeen parte hartzea bultzatzen du. Horretarako, adingabeen eskura jartzen du udal politiketan eragin eta erabakitzeko aukera. Hilaren 20an programa horretako urteroko saio bateratua egin zen Donibanen, eta ikasleek beren proposamen, kezka eta iradokizunak helarazi zizkieten udal zerbitzuetako arduradunei, teknikariei eta politikariei.
Proposamen horietako askok kirolarekin zerikusia zutela jakinarazi du Julen Rodriguez Haur, Nerabe eta Gazteen arloko zinegotziak. Proposamen horien artean, zenbait ikaslek yoga ikastaroak antolatzea iradoki zuten. Bada, udalak ikasleen proposamen hori egikarituko du, eta lau adin tarteetan banatutako doako yoga ikastaroak eskainiko ditu martxoaren 10etik 18ra, Antxoko Kultur Etxean.
Hona hemen yoga saioen egutegia:
- Martxoak 10: 17:30-18:30. 6-12 urte arteko haurrentzat.
- Martxoak 11: 17:30-18:30. 13-17 urte arteko gazteentzat.
- Martxoak 17: 17:30-18:30. 18-65 urte arteko herritarrentzat.
- Martxoak 18: 17:30-18:30. 65 urtetik aurrerako herritarrentzat.
Saio horietan parte hartzea doakoa bada ere, plazak mugatuak direla jakinarazi du udalak, eta izen-emate ordenaren arabera esleituko dira. Udalak aurreratu du posta elektroniko bidez jakinaraziko dela plaza baieztatua dagoela. Izen-ematea orokorra bada ere, pasaitarrek lehentasuna izango dutela baietsi du udal erakundeak. Izena emateko esteka udalaren webgunean topa daiteke.
Ikastaroetan parte hartzeko, kirol arropa erosoarekin joatea beharrezkoa izango dela adierazi du udalak, eta hala nahi duten parte hartzaileek beren estera eraman ahal izango dute.
