Hiltegi zaharraren inguruaren izaera nautikoa indartzeko lanak aurrera doaz
Ondartxo-Iztietako arraun instalazio berria eraikitzeko lanak aurrera doaz. Lanak egiteko skatepark-a desmuntatu behar dela-eta, berria jartzea erabaki du udalak.
Errenteriako Udalak arraunerako instalazio berri bat eraikiko du, 2020an egindako pantalanaren instalazioari jarraipena emanez. Instalazio berriak zurezko akabera izango du eta Oiartzun ibaian kirola egiteko ontziak biltegiratzea ahalbidetuko du. Proiektuak hiltegi zaharraren inguruan izaera nautikoa indartzea du helburu, gaur egun bertan egiten diren jardueren erabilera aukerak hobetuz. Obrak uda hasieran amaitzea aurreikusten da, eta aurrekontua 465.000 euro ingurukoa da.
Lanak egin bitartean, inguru horretako aparkalekuak aldi baterako kendu direnez, behin-behineko beste batzuk gaitu dituzte. Obrak iraun bitartean, ezingo dira komun publikoak erabili. Bestalde, lanak egiteko skatepark-a desmuntatu behar izango denez, eta hura egora txarrean dagoela ikusita, berria jartzea erabaki da. Aipatutako lanez gain, hiltegi zaharra ere birgaituko da.
Instalazioak martxan jartzean, Hibaikak udal ekipamendu horretan garatzen dituen jarduerez gain, uretako herri kiroletarako espazio bat eta espazio komunitario bat ere jartzea aurreikusi da. Orain hori egiteko kontratazioa abian jarri, eta datozen hilabeteetan lanei ekiteko proiektua eguneratzen dihardu udalak.
