Gaurkoa, Trapujaleren azken eguna Lezon
Arratsaldean epaiketa txikia egingo diote Lezo Herri Eskolan, eta ilunabarrean epaiketa nagusia eta Herio Bidaia izango dira.
Azken orduak ditu Lezon Trapujalek. Gaur da herriko inauterien Asteartebeltza. Lehneik eta behin, Lezo Herri Eskolan epaiketa txikia egingo diote (15:15ean, ondoren txokolatada), eta ondoren, ilunabarrean, epaiketa handiaren txanda izango da, Gurutze Santuaren plazan 19:00etan. Herritik zabaldu dute Trapujalek zazpi ardi ebatsi eta jan zituela; horregatik egingo diote herri epaiketa plazan. Albiste horren zabalkundean zerikusia izan dute Marinazkanek eta Zirikuek (bertsio baten arabera, Zirikuek egin zuten ardien lapurreta). Edonola ere, eta inauterien egitarauan horrela jarrita dagoelako, epaiketaren ondoren Herio Bidaia egingo du Martizkone baserrikoak; ziurrenik, ardien lapurretaren errudun izendatuko dutelako, azken 36 urteetan egin bezala. Ez da libratuko sutik.
Oso emankorrak izan dira Lezoko inauteriak. Eguraldia lagun, aski ongi gauzatu dira Jai Batzordeak proposatutako ekitaldi guztiak. Jendetsuak, koloretsuak eta alaiak izan dira. Inauterien bukaera beltz samarra izan arren, adi Trapujaleren espirituak plazan arratsaldean esango dituenei. Lasai, ziurrenik ere 2026ko inauterietan herrian izango dela herritarrekin batera mozorroen festaz gozatzen.
