Trintxer futbol zelaiak aurpegi berria du
Iazko udan, udalak zelaiko belar artifiziala aldatu zuen. Azken asteetan jokalarien aulkiak ordeztu dituzte, markagailu elektronikoa jarri dute eta zelaiko perimetroa babesteko sare bat instalatu dute.
Andonaegiko futbol zelaiak aurpegi berria du. Pasaiako Udala 2024ko udan hasi zen Trintxerreko zelaiko belarra aldatzen, belar artifiziala “egoera kaskarrean” zegoelako. Europatik iritsiko diren ingurumen betebeharrei erantzuteko, kautxua kortxoarekin ordeztu zela jakinarazi du udalak.
Belar artifiziala aldatzeaz gain, beste hainbat inbertsio egin dira Trintxerren, instalazioen egoera “optimoa” izateko. Jokalarien aulkiak ordeztu direla eta markagailu elektroniko berria instalatu dela adierazi du Julen Rodriguez Kirol zinegotziak. Bi jarduketa horietarako 5.285,90 euroko inbertsioa egin du udalak.
Aldaketa horiez gain, zelaiko perimetroa babesteko eta baloiak Donostia kalera irtetea saihesteko, sare berri bat instalatu dute berriki. Horrez gain, hondatuta dagoen sare metaliko perimetrala ere konponduko dela aurreratu du udal erakundeak. Lanekin bukatzeko, Trintxerreko hormigoizko hormak txukunduko dituzte. Jarduketa horiek egikaritzeko, 22.831,67 euro inbertituko ditu Obra eta Zerbitzu sailak.
