Oldarraldien aurrean, aliantzak eraikitzen segitzera deitu du mugimendu feministak
Dozenaka herritarrek erantzun diote Lezoko Mugimendu Feministak gaurko deitu duen manifestazioari. Lezoko Udalak ere jarri du alea, Aralar kaleko plaza Miren Gezala plaza da gaurtik.
Manifestazio jendetsua egin dute gaur eguerdian Lezon. Manifestazio jendetsua egin dute gaur eguerdian Lezo. Dozenaka herritarrek erantzun diote Lezoko Mugimendu Feministak gaurko deitu duen manifestazioari. Bandera eta zapi moreekin koloreztatu dute bildutakoek Gurutze Santuaren plaza; bertatik abiatu da manifestazioa 12:30ean. Aurretik, irakurketa egin du mugimendu feministak. Ozen esan du, urtez urte, gehiago direla kalera ateratzeko dituzten arrazoiak, “izan ere, bada garaia emakume, trans eta bollerok jasaten dugun zapalkuntzekin amaitzeko. Sistema zisheteropatriarkal kapitalista kolonial eta arrazistak birfundatzen jarraitzen du”.
Pankartan, Euskal herriko Mugimendu Feministak gaurko egunerako aukeratu duen leloa Lezon ere: Faxismoaren kontra ausardia eta aliantza feministak. Ezinbestean, erreferentzia faxismoari irakurraldian. Eskuin muturraren gorakada eta jarrera erreakzionarioen ugaltzea begi bistakoa dela jarri du nabarmen mugimendu feministak eta ohartarazi ez dela solik urrutiko zerbait, “eskuinetik datorrena ez da mugimendu estanko bat”.
Eskuin muturretik erasoak, baina ez soilik hortik, ezkerreko sektore batzuetan ere “feminismoarekiko kontrakotasuna edota diskurtso arrazisten gorakada” ikusten ari direla esan du, “aipaturiko guztiak emakume trans eta bolleroen zapalkuntza eragiten du batez ere”. Halaber, jarrera eta posizionamendu belizistak indarra hartzen ari diren unean, indarkeriarik gabeko bizitzak izateko eskubidea aldarrikatu du, “jarrera horiek gure gorputz eta lurraldeen aurkako zapalkuntzak areagotzen dituelako”.
Bidea luzea da aurretik, ez da zalantzarik horretan, baina urtez urte egindako lanak eta borrokak garaipenak ekarri dituela onartu du mugimendu feministak, “hala ere, ez da erraza izan, mugimendu feministak urrats bat egiten duen bakoitzean, oldarraldi erreakzionario bat jasotzen dugu bueltan pribilegioak kolokan ikusten dituztenen aldetik. Horregatik diogu, feminismoekin posizionatzeko ausardia aldarrikatzen dugula, norbere erosotasunetik ateratzeko aldarri gisa eta erresistentzia zein ofentsibarako lubaki gisa”. Hori horrela, feminismoa ezkerreko borroken erdigunera ekarri beharra jarri dute erdi-erdian Lezoko feministek, “feminismo antiarrazista, antikolonialista, antikapitalista, eta antiklasista”.
Gaurkoan, orain arte egin bezala zapaltzen dituen sistema baten aurka atera direla kalera adierazi dute. Zapalkuntza horiek, askotarikoak direla azaldu dute, gainera, “maila mikroenetatik hasi eta makroenera”, eta hiru ardatz nagusitan banatu. Indarkeria matxistarena da horietan lehena eta horren harira emakume trans eta bolleroek jasaten dituzten eraso eta menderakuntza egoerekin amaitu beharra nabarmendu dute: “Soldata arrakala, ordaindu gabe egiten dugun lana, kristalezko sabaiak… Indarkeria dira eta sistema betikotzeko ezinbesteko tresnak”.
Krisi ekosoziala kokatu dute bigarren tokian: “Bizitza akabatzen duen sistema baten aurrean gaude, bai pertosnen bizitzak, bai natura bera. Baliabide naturalak eta lurra bera pribatizatuta daude eta Iparraldeko herriek Hegoaldekoak kolonizatzen jarraitzeko ezinbesteko tresna da hori”. Horrekin amaitzea exijitzeko ardura ere badutela euskal herritarrek sinistuta azaldu da mugimendu feminista.
Hirugarrenik, migrazio politikak aipatu ditu, “egungo sistema arrazista eta koloniala betikotzen dutenak”. Hori horrela, ezinbestekoa jo du atzerritartasun legearekin bukatzea, “ez hori bakarrik, urgentziaz borrokatu behar ditugu migrazioaren kontra ematen ari diren jarrera arrazistak, eta segurtasunaren izenean polizia gehiagoren beharra aldarrikatzen dutenen diskurtsoak, horiek ere arrazakeria areagotzen baitute”.
Mugimendu feministak aipamena ere gaurko irakurraldian hainbat gatazketan borrokan eta erresistentzian dabiltzan emakumeei, “hemendik gure babesa eta elkartasun osoa Palestina, Sahara, Kurdistan… besarkada bana Lezotik”. Mezua herritarrei ere, segi dezagun aliantzak eraikitzen oldarraldiz beteriko garai hauetan, elkartu eta saretu gaitezen herriz herri eta asanbladaz asanblada. Batu ditzagun indarrak herri eta jendarte feminista bat eraikitzera bidean”. Ildo horretan mezu argia helarazi du, bide horretan aspaldi hasi zirela eta ez dutela inongo asmorik atzerapausorik egiteko, “faxismoaren kontra, ausardia eta aliantza feministez armaturik gaude”.
Miren Gezalak plaza du Lezon
Eta jendarte parekide hori erdiesteko bidean urrats bat aurrera egin du gaur Lezok. Euskal Herri luze zabaleko herri asko-askotan bezala, Lezon ere, espazio publikoen izendapenean defizita dago. Hala aitortu dute gaur Eneritz Arruti eta Mireia Cuesta Berdintasun zinegotziek mugimendu feministak deitutako manifestazio bukaeran. Hori iraultzen hasteko lehen urratsa egin dute gaur, eta Aralar kaleko plaza Miren Gezala plaza da gaurtik. Espazio publikoei emakume izena ematea da Arrutiren hitzetan, horiek egindako ibilbideari aitortza egiteko “aukera paregabea” baita gaurko eta etorkizuneko gizarteari emakumeek egindako ekarpena helarazteko erreminta.
Hunkituta jaso dute izendapena Miren Gezalaren senideek, eta bihotzez eskertu udalari aitortza hori. Gezalaren gaineko zertzelada batzuk eman dituzte ondoren hura ezagutu zuen Agustina Pontestak idatzitako gutunaren bidez. Cuestak irakurri du gutun hori. Txalo artean desestali du Miren Gezalaren izena daraman plaka haren ilobetako batek, hunkituta eta eskertuta.
Plazaren izendapena eginda, Saldise Plazan bukatu dute brindis feminista eginez.
