Kattalin Arabolazak irabazi du Gipuzkoako Eskolartekoaren lehena
Arabolazaz gain, Jare Antzizar eta Julen Olaizola ere lehiatu ziren Errezilgo saioan. Oiartzuarra finalera pasa da zuzenean.
Ostiralean hasi zen Bertsozale Elkarteak eta Ikastolen Elkarteak lankidetzan antolatutako Eskolarteko Gipuzkoako Txapelketa. Lau kanporaketa eta finalak osatzen dute Gipuzkoako Txapelketa, eta Nafarroakoa, Arabakoa, Bizkaiakoa eta Xilabako Gate Xapelgoa izango dira gero. Azkenik, Euskal Herriko finala jokatuko dute txapelketa bakoitzeko lehen bi sailkatuekin.
Hilaren 7ko kanporaketa Errezilen jokatu zen, eta Kattalin Arabolaza oiartzuarra izan zen garaile. Finalera pasa zen zuzenean gaztea. Hurrengo kanporaketak Aretxabaleta, Amasa eta Aizarnazabalen izango dira.
Arabolazak bigarrenez hartu du parte eskolartekoan, eta bietan lortu du finalerako txartela. 50 lagun elkartu ziren Errezilgo Erniope elkartean, baina beste 30 lagun inguru ere bertaratu ziren bertso saioa entzutera. Hortaz, saio jendetsua izan zela esan daiteke.
Jare Antzizar eta Julen Olaizola ere lehiatu ziren saioan.
