Hitzarmena sinatu dute Herri Arte Eskolak eta Dantzertik
Helburua, bi zentroetako ikasleen esperientzia pedagogikoa eta artistikoa aberastea, diziplina arteko ikasketa sustatuta.
Ralla, Zorzano, Izquierdo eta Otaegi. Herri Arte Eskolaren eta Dantzerti Euskadiko Arte Dramatiko eta Dantzako Goi Mailako Eskolaren arteko hitzarmena aurkeztu dute gaur Aizpea Otaegi alkateak, Aitor Zorzano Herri Arte Eskolako lehendakariak, Beñat Ralla Herri Arte Eskolako Pedagogia koordinatzaileak, eta Unai Izquierdo Dantzertiko zuzendariak.
Dantzerti Euskadiko Arte Dramatiko eta Dantzako Goi Mailako eskola da.
Hitzarmenak Herri Arte Eskolak diziplina ezberdinetara zabaltzeko duen konpromisoa berresten duela esan du Zorzanok, “musikatik harago doan eskaintza egitea, alegia. Eta horrekin batera, kasu honetan, antzerki eta dantza ikasgaiak sendotzeko balioko du, gainera”. Hezkuntza lankidetzarako markoa ezarri duela bi erakundeentzat azaldu du bestalde, eta iraupena, berriz, hiru urteko izango dela, aurten hasita, “luzatzeko aukera izango du”.
Helburua, bi zentroetako ikasleen esperientzia pedagogikoa eta artistikoa aberastea, diziplina arteko ikasketa sustatuta. Zehazki, hitzarmen honi esker, Dantzertiko ikasleek aukera izango dute Herri Arte Eskolako hezkuntza komunitateari zuzendutako tailerrak, aurkezpenak, praktikak eta jarduera pedagogikoak egiteko. Era berean, tarteka emanaldiak antolatuko dituzte, ikasleek Errenteriako hainbat kultur ekimenetan parte hartzeko aukera izan dezaten.
Hitzarmen honek, gainera, hasiera emango dio 2026ko udarako Udako Antzerki Campus bat sortzeko bi erakundeen arteko lan-ildoari. Campus honen sorreraren helburua da Errenteria-Orereta prestakuntza artistikorako erreferentzia-puntu gisa sendotzea.
Beste arlo bati egin dio erreferentzia Rallak. Musika Goi Mailako ikasketak jendartean ezagunak badira ere, sinistuta dago ez dela horrela gertatzen, antzerkia edota dantzarekin: “Goi Mailako musika Musikenen edo Iruñean ikas daiteke, baita dantza eta antzerkia Euskal Herrian bertan. Dantzertik hamar urteko ibilaldia du soinean eta atzerrira joan gabe ikas daiteke arte dramatikoa edo dantza goi mailan bertan”.
Herri Arte Eskolak lurraldea saretzeari garrantzia eman diola azaldu du bestalde zentroko zuzendari pedagogikoak, “nabarmen jartzen ari gara izenpetzen ari garen hitzarmenen bidez, eta uste dugu gainera, eragile ezberdinen misioa izan daitekeela saretze horren bidez Dantzerti ere bere lurraldean hedatzea eta kasu honetan gure hezkuntza komunitatean goi mailako dantza eta arte dramatiko ikasketak egitea posible dela sustatzea. izan ere, arte biziak ez dira bestelakoak baino ahulagoak, ikasketa unibertsitarioak ere egin daitezkeela bi esparru horietan eta gure ikasleen iruditegira eraman nahi dugu hori”.
Aitortu du, azken urteetan izan badirela aukera hori aztertzen hasiak diren ikasle eta gurasoak, “kasu bakanak dira oraindik, tantaka hasi dira. Hori ere bada Dantzerti Barakaldotik Gipuzkoara, errenteriara, gure komunitatera ekartzearen arrazoia”.
Hitzarmena “luxuzkoa” dela esan du Izquierdok. Dantzertikoarentzat Errenterian izatea aukera paregabea da, “Herri Arte Eskola, bi antzoki, nik esango nuke kulturaren Disneylandia dela Errenteria eta guretzat oso estrategikoa da Herri Arte Eskolan egotea”.
Hitzarmenarekin lotuta bi data eman ditu Izquierdok. Lehena, hilaren 30ean, La Intrusa konpainiak zuzendutako Basazuria dantza emanaldia emango dute 19:00etan; bigarrena, apirilaren 28an, Jokin Oregik zuzendutako Eldarnio. Delirio antzezlana, 19:00etan ere. Publikoari irekita egongo dira, edukiera bete arte. Gonbidapenak doakoak izango dira eta lotura honetan erreserbatu daitezke. Hilaren 30ean, 17:30ean Dantzertiko Goi Mailako Dantza Ikasketen inguruan informazio saio bat egingo da Herri Arte Eskolan, eta apirilaren 28an, 17:30ean Dantzertiko Goi Mailako Arte Dramatikoko Ikasketen inguruko informazio saio bat ere egingo da Herri Arte Eskolan.
Izquierdoren bidetik egin du Otaegik eta udalarentzat ere luxuzko hitzarmena dela aitortu du, “luxuzko elkarlanerako aukera bat zabaltzen da hitzarmen honekin eta esku zabalik jasotzen dugu gure eskolan eta hemen ditugun baliabideak Dantzertiren eskura jartzen ditugu”,. Bi eskolentzako oso “aberasgarria eta emankorra” izan daitekeen elkarlana abiatu dutela eta nabarmen jarri den ideia bat indartu nahi izan du Otaegik, “dantzaren eta antzerkiaren esparruko ikasketa profesionalak Euskal Herrian egiteko aukera badugu eta egiten duguna da aukera hori hurbildu gure herrikideentzat eta gure eskualdean zein inguruan bizi direnentzat. Antzertiren nodo moduko bat hemen izatea luxua da herritarrentzat eta ikasketa profesionaletarako ikaragarrizko aukera zabaltzen du”.
Dantzerti Herri Arte Eskolan izateak Errenteria-Oreretaren erreferentzialtasuna “indartu” eta aukerak zabaltzen dituela gaineratu du Otaegik, “eta hori oso pozgarria da”.
