Taupada Festen azkena, hilaren 29an
Hilaren 29an Zintzilik irratiaren alde egiten den Taupada Fest jaialdiaren X. ekitaldia jasoko du Trintxerpeko Mogambo aretoak, 21:30etik aurrera. Bost musika talde igoko dira oholtzara.
Hilaren 29an Errenteria-Oreretako Zintzilik irrati librearen alde egiten den Taupada Fest jaialdiaren X. ekitaldia jasoko du Trintxerpeko Mogambo aretoak, 21:30etik aurrera. Orotara, bost musika talde igoko dira Trintxerpeko aretoko oholtzara: On (Donostia), Trilita (Errenteria-Orereta), Las Sexpears (Barakaldo), Chuleria Joder! (Ezkerraldea, Bizkaia) eta DJ Ausente (etxekoak). Sarrerek 10 eurokoa prezioa dute.
Hilaren 29koa, hau da, Taupada Festen hamargarrena, azkena izango dela jakinarazi dute antolatzaileek. Lehen Taupada Fest 2014ko otsailean izan zen Mogambo aretoan, eta azkena leku berean izango da. Aurten Zintzilik irratia bere 40. urteurrena ospatzen ari da, eta Taupada Festek ere hamargarrena beteko du. Nahiz eta zifra borobilak izan, antolatzaileek adierazi dute ez dutela ezer berezia egingo, orain arteko bideari jarraipena emango baitiote. Aurrez aipatu bezala, lau kontzertu eta etxeko DJ batek osatzen dute musika programazioa. Horrez gain, zozketa iruzurtia egingo dute eta irratiak eta taldeek material postuak jarriko dituzte.
Antolatzaileek hamar urte hauetan lanean izan den talde “leiala” errekonozitu nahi izan dute. Lantalde hori edizio bakoitza aurrera ateratzeko beti laguntzeko prest izan dela nabarmendu dute sustatzaileek. Pertsona horiek barran, sarreran, kartelen diseinuan, kartelak jartzen, bazkariak eta afariak prestatzen, teknikan, muntaketan edota bilketan izan dira, irrati librearen aldeko “ezinbesteko” laguntza emanez.
Lanerako prest izan diren pertsonen lana eskertzeaz gain, antolatzaileek “modu desinteresatuan” Mogambon izan diren musika taldeei beren parte hartzea eskertu diete, baita kontzertuen ondoren Trintxerpen izan diren DJei ere. Publikoarentzako ere esker hitzak izan dituzte, urtez urte “pixkanaka” handitzen joan delako.
Hamargarrena eginda, etapa ixteko momentua iritsi dela ikusi dute sustatzaileek. Ziur dira beste bide batzuk irekiko direla aurrerantzean, baina “nekeak eta monotoniak inertziaz zerbait antolatzera behartu aurretik”, nahiago izan dute hilaren 29koa azken Taupada Fest izatea.
Bukatzeko, aipamen berezia egin diote Mogambo aretoari, espazioa uzteagatik, izan duten pazientziagatik eta beren artean sortu den adiskidetasunagatik. “Mogambok hor jarraitzen du bere filosofiarekin, beraz, inoiz baino beharrezkoagoa den espazio alternatibo baten autogestioan laguntzen jarraitu behar diogu, musikak eta zaratak inposatutakoaren aurka aurrera jarraitzeko”, esan dute antolatzaileek.
