Igogailu berria eraikitzea proposatu du PSE-EEk
Galtzarabordako trenbidea estalita sortuko den plaza eta Galtzaraborda eta Alaberga auzoetako goiko aldeak lotuko dituen igogailua litzateke.
Pse-eeko ordezkariak obren inguruan. Argazkia: PSE-EE Galtzarabordako trenbidea estalita sortuko duten plaza eta Alaberga eta Galtzaraborda auzoetako goiko aldeak lotuko dituen igogailua eraikitzea proposatu diola Eusko Jaurlaritzako Mugikortasun Iraunkorreko kontseilariari azaldu du PSE-EEk. Komunikabideetara bidalitako prentsa ohar bidez egin du jakinarazpena alderdi sozialistak eta gaineratu du, “jarrera egokia aurkitu dugu proiektu hori Galtzarabordako estalpea egiteko lanen barruan txertatzeko. Asebete gaude”.
Joan den astean jakinarazi zuen ETSk lizitaziora atera duela Galtzarabordako trenbidea estaltzeko proiektuaren idazketa. Begi onez hartu du berria alderdi sozialistak, “Galtzaraborda eta Alaberga auzoen arteko haustura urbanistikoa gainditzeko ezinbestekoa da eta gainera, zabalagoa den eraldaketa baten lehen urratsa da. Izan ere, ondoren, Gaztañoko trenbide-pasagunea ezabatuko da eta Galtzarabordako geltokia berritu”.
Proposatu duen igogailuaren gainean esan du, azken horrek, bizilagunen eguneroko joan etorriak erraztuko dituela, “batez ere adineko edota mugikortasun arazoak dituzten herritarrenak”.
