Herritar oro deitu dute etorkizuneko herria elkarrekin irudika dezaten
'Errenteria 2040' prozesua jarri zuten martxan pasa den astean; plan estrategiko berria idaztea du helburu horrek.
Errenteria 20240 prozesua jarri zuten martxan pasa den astean Lekuona Fabrikan, eta, orain, herritar ororen txanda da prozesu parte hartzailearekin aurrera jarraitzeko.
Prozesuaren lehen fasean, martxoan eta apirilean alegia, zortzi saio egingo dituzte; horietatik lau eragileei begirakoak izango dira, eta beste laurak herritarrei begirakoak. Saio bakoitzean gai konkretu bat landuko dute etorkizunean herria nolakoa izatea nahi duten zehazteko. Zehazki, honakoak dira ildo nagusiak: herritarren ongizatea; komunitate izaera; hiriaren antolaketa eta gobernatzeko modua.
Gai horiek bereizita landuko dituzte bina saiotan, herritarrekin jorratzeaz gain eragile sozial, kultural eta ekonomikoek ere landuko baitituzte.
Herritarren saioak hilaren 19an, 27an eta apirilaren 2an eta 9an izango dira. Eragileenak, berriz, hilaren 18an, 26an eta apirilaren 1ean eta 8an. Hilaren 19ko saioa Agustinak Zentroan izango da, eta herritarren ongizateari buruz hausnartuko dute bertan. Deialdi irekiak dira, baina antolatzaileek aurrez izena ematea gomendatu dute, hemen.
Hilaren 6an ekin zioten Errenteria 2040 plan estrategiko berria idazteari, eta ekitaldian udalak, herriko eragileek eta herritarrek hartu zuten hitza. Prozesu honen bidez datozen hilabeteetan Errenteria – Orereta hamabost urte barru nolakoa izatea nahi duten irudikatzeko ariketa egingo dute.
Datozen hamarkadetako hiri eredua definitu nahi dute prozesu honekin, aurrera begirako erronkak zehaztuz eta etorkizunari heltzeko proiektuak diseinatzeko norabide partekatua marraztuz. “Errenteria 20240 planak ikuspegi integrala landu nahi du, eta hori dela eta, herritarren ongizatea, kohesio komunitarioa, hiri antolaketa eta gobernantza eredu berritzaileak uztartuko ditu hausnarketa prozesuan”.
Ondorioz, bi fasetan banatuko dute prozesu parte hartzailea. Lehenik, aurreko planaren balantzea eta herriaren diagnostiko garatua egingo dituzte, eta horretarako azken urteetako esperientziak eta lortutako emaitzak aztertuko dituzte.
Era berean, etorkizuneko erronkak ere identifikatuko dituzte. “Horrela, uda ostean abiatuko den bigarren fasean aurrez definitutako erronkei erantzuteko proposamenak landuko dira”, gehitu dute.
