Bakailaoaren festa Pasaian lurreratuko da
Hilaren 24tik apirilaren 6ra bitartean Gipuzkoako V. Bakailao Ibilbidea egingo da Gipuzkoako 50 establezimendutan. Lehiaketaren finala, hau da, Gipuzkoako XI. Bakailaozko Pintxo Txapelketa, Juanba Berasategin izango da, apirilaren 8an.
Hilaren 24tik apirilaren 6ra bitartean, Gipuzkoa osoko 50 ostalaritza establezimendu baino gehiagok Gipuzkoako V. Bakailao Ibilbidean hartuko dute parte; horietako asko, gainera, Oarso-Bidasokoak dira. Horrez gain, apirilaren 8an Gipuzkoako XI. Bakailaozko Pintxo Txapelketa lehiatuko da Donibaneko Juanba Berasategi aretoan, 16:00etan. Iniziatiba Gilda eta Pintxoaren Kofradiak sortutakoa da, Pasaiako Udalak eta Gipuzkoako Foru Aldundiak sustatzen dute, eta Oarsoaldea Garapen Agentziaren laguntza du. Teo Alberro Pasaiako alkateak, Azahara Dominguez Mugikortasuneko, Turismoko eta Lurralde Antolaketako diputatuak, Sonia Garcia Gilda eta Pintxo Kofradiaren kideak eta ekitaldiaren antolatzaileak eta Aitor Brion Kultura eta Ondare zinegotziak bakailaoaren festaren bueltako jarduerak aurkeztu dituzte gaur goizean, udalbatza aretoan.
Egitasmoaren helburua da Gipuzkoako ostalaritza sustatzea. Sukaldariek bakailaoa osagai nagusi duen pintxo bat aurkeztuko dute lehiaketan, aukera libreko beste produktu batzuez lagunduta. Bakailao pintxoak hilaren 24tik apirilaren 6ra bitartean dastatu ahal izango dira, eta finala apirilaren 8an izango da, Juanba Berasategin, 16:00etan. Aurreko urteetan bezala, finala showcooking formatuan egingo da. Parte hartzaileek pintxoak zuzenean prestatuko dituzte publikoaren aurrean, eta epaimahaiak establezimendu irabazlea erabakiko du. Finalerako sarrera irekia izango da.
Teo Alberrok adierazi du pintxoak eta bakailaoa egunerokoan, aisian edota harremanak egiteko orduan bi erpin “garrantzitsu” direla. Gaur aurkeztu duten txapelketak bi aldagaiak batu eta ibilbide batean elkartu ditu. Urtetik urtera harrera ona izan duen iniziatiba dela baietsi du alkateak, eta, horregatik, “harro” daude Pasaian berau sustatzeaz. “Txapelketa honek bertako ostalaritzari eta gastronomiari balioa ematen die, oholtzara ekartzen ditu protagonismo osoz, eta gure kulturaren aberastasunaz gozatzeko aukera eskaintzen digu guztioi bakailao pintxoen bidez”, nabarmendu du Alberrok.
Azahara Dominguezek ere baikor baloratu ditu bakailaoaren bueltako jarduerak: “Hitzordu honek mundu osoan ezagutzera eman digun gure gastronomiaren balioa nabarmentzeko aukera ematen digu, baita gure ekonomia dinamizatzeko aukera ere, gure ostalaritza establezimenduetan kontsumoa sustatzen baitu bisitari gutxiago biltzen diren urteko ine batean”.
Sonia Garcia antolatzaileak nabarmendu du aurreko ekitaldietako parte hartzaileen maila “oso altua” izan zela, eta aurten ere bide beretik jarraituko dutela ziur da, egitasmoa beste herri batzuetara ere zabaldu baita. “Gipuzkoa harro egon daiteke pintxo sukaldari handiak izateaz, guztiak ere gure produktua den bakailaoa lantzen esperientziadunak”, esan du Gilda eta Pintxoaren Kofradiaren kideak. Horrez gain, parte hartzen duten tabernen kalitatean, kantitatean eta aniztasun geografikoan jarri du arreta Garciak.
Azkenik, Aitor Brion zinegotziak honakoa esan du iniziatibaren inguruan: “Pasaian beti izan dugu lotura berezia itsasoarekin eta, horrekin batera, bakailaoa gure kulturaren eta gastronomiaren parte da. Egitasmo honek ez du soilik gure ostalaritza sustatzen, baizik eta gure tradizioak zaintzen eta belaunaldi berriei transmititzen laguntzen du. Bakailaoa gure mahaietan protagonista izan da mendeetan zehar, eta gaur egun ere, sukaldariek berrikuntzarekin eta tradizioarekin jolasten dute produktu honi balioa emateko”.
Errenteria-Orereta
- Aker.
- Elpalante.
- Xera Gastroteka.
Hondarribia
- Danontzat.
- Itxaropena.
- Kantina.
- Larra.
- Mika.
- Rafael.
- Tatapas.
Irun
- Bakar.
- Colon.
- Don Jabugo.
- Faisan Ostatua.
- Felix Manso Ibarla.
- Gaztelumendi.
- Iñaki
- Irungo Atsegiña.
- La Vinoteca.
- Manolo.
- Tostadero.
Pasaia
- Arkupe Berri (Donibane).
- Ziaboga (Donibane).
- Busturia (Trintxerpe).
- Caserio (Trintxerpe).
- La Bodeguilla (Trintxerpe).
- Ulia (Trintxerpe).
