Gazteen errealitatea ezagutzeko bidean, buruko osasunaren gaineko lan saioa
Gazteen errealitatea ezagutzeko diagnostikoa egiten ari da Errenteriako Udala. Horren barruan, buruko osasunaren gaia ere landu nahi du.
18-30 adin tarteko errenteriarren errealitatea, kezkak eta nahiak ezagutzeko diagnostikoa egiten ari da Errenteriako Udala. “Udalaren politika publikoak gazteriaren beharretara egokitzeko” egiten ari da lanketa. Bide horretan, buruko osasunaren alorra landu nahi du, eta horretarako, lan saio irekia antolatu du udal erakundeak hilaren 24rako, 18:00etan, Reina aretoan, “buruko osasunari buruz hitz egiteko eta datuak biltzeko. 18-30 urte bitarteko errenteriarrak saioan parte hartzera animatu nahi ditugu”.
Jada aurrelana egina du udalak. Diagnostikoa osatzeko gazteei zuzendutako galdetegia egin, eta jada 300 erantzun izan dituela jakinarazi du. Jasotako datuak ikertu dituzte. Hilaren 24ko lan saioa horiek osatzeko izango dira, kasu horretan buruko osasunetik enfokatuta.
Reina aretoko saiorako aurrez izena eman dezatela dei egin die udalak gazteei, nahiz eta izena eman gabe ere parte hartzeko aukera zabalik izan. Erreserba egiteko baliatu esteka hau.
