Garagardo artisau afariaren hamargarrena antolatu du Txintxarrik
Apirilaren 5ean izango da Txintxarri elkartean. Oraindik ere sarrera gutxi batzuk badira salgai eta interesdunek, 608 77 02 59 telefono zenbakira deitu behar dute lekua hartzeko.
Basqueland garagardoa izango dute aurtengo protagonista. Txintxarri elkarteak artisau garagardoaren afaria antolatu du hamargarrenez. Aurten gainera, elkartearen 40. urteurrena ospatzen ari dira eta ospakizun egitarauaren barruan txertatu dute afari hori. apirilaren 5ean izango da, eta orain arteko formatu bera mantenduko dutela jakinarazi dute: afaria, alemaniar erakoa izango da, eta entsalada, saltxitxak, ukondoa eta brownia dastatuko dituzte bertaratzen direnek, garagardoz lagunduta.
Afaldu bitartean, garagardo ekoizlearen azalpenak entzuteko aukera izango dute, baita zuzenean berekin edozein zalantza argitzekoa ere. Basqueland garagardo egilea izango da aurten.
Afariaren prezioa, 35 eurokoa da eta oraindik ere txartel gutxi batzuk gelditzen direla aforoa bete arte jakinarazi dute antolatzaileek. Interesdunek, 608 77 02 59 telefono zenbakira deitu behar dute lekua hartzeko eta egunean bertan ordaindu beharko dute, eskudirutan, Txintxarri elkartean 20:45ean.
2014an abiatu zuen artisau garagardo gauen aroa Txintxarri elkarteak, Arraguako Goiko Eskolako Kulturgune Okupatuan hainbat lagunek garagardoa ekoizteko egindako ikastaro batetik abiatuta. Gogora ekarri dute garai haietan ez zela existitzen gaur egun inguruan dituzten garagardogile artisaurik, “guk edo inguruko ekoizle txikiek egindako garagardoen dastarekin hasi ginen. Oarsoaldean zein Euskal Herrian ere aitzindaria izan da iniziatiba hau, eta COVID garaian baino ez genuen eten”.
