Hibaikako Senior Emakumeak eta gazteak onenak Getarian
Bikain aritu dira Gipuzkoako Batel Txapelketan Hibaikako Emakume Seniorrak eta Emakume Gazteak; biek ala biek irabazi dute estropada.
Hibaikako Emakume Absolutuen ontzia, aurrekoe stropada batean.J.A Rodriguez Bikain aritu dira Hibaikako Emakume Seniorrak atzo Getarian jokatutako Gipuzkoako Batel Txapelketako zortzigarren jardunaldian. Nagusitu egin ziren errenteriarrak San Juango ontziari hiru segundoko aldea aterata. Bi ontziak bakarrik aritu ziren lehian euren kategorian, eta Hibaikakoek gogotik eutsi diote sailkapen orokorrean duten lehen postuari.
Bide beretik Emakume Gazteen ontzia. Horrek ere, garaipena atzoko jardunaldian, arraunketa bikaina erakutsita. Bigarren sailkatua izan zen Tolosaldeari sei segundoko aldea atera zioten Hibaikakoek. Elkarte bereko bigarren ontzia, seigarren sailkatu zen.
Kategorien hurrenkerari jarraituta, Haur mailako Neskek azken aurreko lekua erdietsi zuten atzoko estropadan. Promesetan, berriz, nesken Hibaika A ontziaren lan ona, seigarren sailkatuta. Hibaika B berriz, hamahirugarren sailkatu zen atzoko jardunaldian. Kategoria berean, mutiletan, seigarren postuan sailkatu ziren errenteriarrak.
Gazte mailako mutiletan, zazpigarren postua egin zuten Hibaikakoek, eta Senior gizonetan, berriz, bosgarren postua. Emaitzak emaitza, harrobia indartsu datorrela erakutsi zuten beste behin ere urtean Errenteria-Oreretakoek. Azken txanpan sartua da Gipuzkoako Batel Txapelketa eta hiru estropaden faltan puntuak metatzea dute helburu talde denek, Hibaikak ere. Hurrengo asteburua betea izango dute arraunlariek, izan ere, bi estropada izango dituzte asteburu berean: hilaren 22an, Urdazurin , eta 23an. Azken horretan Haur eta Promesa kategorietakoak baino ez dira lehiatuko. Hilaren 29an Zumaian izango dute estropada.
Getariko estropadaren emaitza guztiak ikusteko klikatu hemen, eta sailkapen orokorra ikusteko, berriz, klik hemen.
