Hondakinak kudeatzeko, udalak baliabideak jarri behar dituela esan du EAJk
Pasaiako EAJk adierazi du "garrantzitsua" dela herritarrak etxeko hondakinak behar bezala kudeatzeko beharraz kontzientziatzea; baina alor horretan pausoak emateko, udalak herritarren esku baliabideak jarri behar dituela nabarmendu dute.
Pasaiako hondakinen afera pil-pilean izan da azken asteetan. Pasaiako birziklapenaren azken datuak apalak dira, zenbateko hori %48an kokatzen baita, Gipuzkoak eta Europak zehazten dituzten datuetatik urrun. Egoera hori iraultzeko, Pasaiako Udalak Etorkizuna birziklatzen kanpaina abiatu zuten urtarrilean, eta urratsak egiten ari da jada. Horrez gain, otsaileko udalbatzan, Pasaian hiri hondakinen prebentzioa eta gaikako bilketa indartuz ekonomia zirkularra sustatzeko plana onartu zen, birziklapenari bultzada emateko.
Egoera horren aurrean, Pasaiako EAJk adierazi du “garrantzitsua” dela herritarrak etxeko hondakinak behar bezala kudeatzeko beharraz kontzientziatzea; baina alor horretan pausoak emateko, udalak herritarren esku baliabideak jarri behar dituela nabarmendu du alderdi jeltzaleak.
2024ko ekainean Pasaiako etxeko eta merkataritzako hondakinei buruzko udal ordenantza onartu zutela baietsi du EAJk. Horrez gain, iragan otsailean Hondakinak Kudeatzeko Plana aurrera atera zen udalbatzan. Plan horretan, besteak beste, udalerrian birziklatzea sustatzeko sentsibilizazio kanpaina bat abiatzea jasotzen dela adierazi du alderdi jeltzaleak. EAJk baietsi du lehen urratsa herritarrak sentsibilizatzea eta motibatzea dela; baina hori lortzeko, udalak “adibide” izan behar duela uste dute, “ezinezkoa baita herritarrei eskatzea udalak egiten ez duena”.
Hori dela eta, bi gertakarik EAJ harritu dutela adierazi dute. Horiek San Pedron eta Donibanen antzeman dituztela esan dute. Donibaneko kasuan, alderdi jeltzaleak jakinarazi du azken hilabeteetan Alde Zaharreko garbitxokoen inguruko bizilagunen kexak jaso dituztela, garbitxoko horien mantenua ona ez delako eta zikinak daudelako. “Gutxienez astean behin garbitzen badira ere, nahiko zikin egoten dira normalean, eta deserosoa da hondakinak uztera joatea”, esan dute.
San Pedrori dagokionean, Esnabide kaleko etxebizitzetan jarri dute arreta jeltzaleek. Bizilagun horiek iazko udazkenean sartu ziren bertara bizitzera, eta egun, 71 familia inguru bizi direla nabarmendu dute. Herritar horiek hondakin gehiago sortuko dituztela baietsi du EAJ, eta horregatik, eremu horretan edukiontzi berriak jartzea eskatu dute: “Dirudienez, udal gobernua ez da gai horretaz jabetu, edo, bestela, ez zaio gehiegi kezkatzen; izan ere, ez da edukiontzi gehiago jarri, eta horrek esan nahi du askotan edukiontziak gainezka daudela”. Alderdi jeltzaleak adierazi du egoera horrek arazoak sortzen dituela herritarrengan hondakinak uzteko.
“Printzipioz, gai txikia izan liteke, baina bereziki garrantzitsua da une honetan, herritarrak hondakinen kudeaketa egokia egiteko eta birziklatzea sustatzeko beharraz kontzientziatzeko kanpaina bat abian baitago. Ados gaude ordenantzaren espirituarekin, bai eta kontzientziazioa sustatzeko beharrarekin ere, baina uste dugu arreta herritarrengan jartzeaz gain, udalak ere bere ardura bete behar duela. Ez du zentzurik bizilagunei eskatzea eta baliabide egokirik ez jartzea eskakizun horiek betetzeko”, salatu du Pasaiako EAJk.
