Jaurlaritzak motibazio politikoko biktima gisa aitortu ditu Pasaiako sarraskian hildako lau lagunak
Senideek eman dute erabakiaren berri. Dionisio Aizpuru, Pedro Mari Isart, Jose Mari Izura eta Rafael Delas 1984ko martxoan hil zituzten tiroz; haien gorpuetan 113 bala zulo zenbatu zituzten.
Pasaiako sarraskian hildako Dionisio Aizpuru, Pedro Mari Isart, Jose Mari Izura eta Rafael Delas motibazio politikoko biktima gisa aitortu ditu Eusko Jaurlaritzak. Haien senideek gaur jakinarazi dute erabakia. Hain zuzen, larunbatean beteko dira 41 urte dozenaka poliziek Komando Autonomo Antikapitalistetako kideak tiroka hil zituztenetik. Senideek adierazi dutenez, etzi prentsaurreko bat eginen dute, lehenbiziko balorazioa egiteko.
Aitortza emateko Jaurlaritzako Balorazio Batzordeak erabilitako dokumentazioaren zenbait pasarte aurreratu dituzte gaur. Batetik, batzordeak ondorioztatu du bizitzeko eskubidea urratua izan dela: «Poliziak nahita eta askoz lehenagotik planifikatutako ekintza baten ondorioz, eta bizitza kentze hori nahita egindakoa izan zela». «Autopsiak hortxe daude; lau gazte zuloz josita, eta frogarik ez armak erabili zituztela esateko; kontakizun ofizialak kontraesan garbi-garbiak ditu; lekukotzek eta zeharka bildutako datuek zalantza objektiboak eragiten dituzte; polizia-agintariek behin eta berriz uko egin diote esateari nortzuk agindu edo parte hartu zuten gertakari haietan; etengabe ibili dira nahas-mahasean ea lortzen zuten informazioa beranduratzea, oztopatzea eta ezkutatzea; faktore horiek denak ustezko egitateak dira, denak ere, azkenean, argi eta garbi norabide berean doazenak: polizia-operazio omen zena, epaiketaz kanpoko exekuzio bilakatzen da», dio pasarteetako batek.
Post mortem ikerketaz ere zenbait xehetasun eman dituzte, erranez kasua ez dela «behar bezala» ikertu: «Ez zen aztertu gertakarien lekua, gorpua altxatzea ere eskas eginda dago, ez zen arropa aztertu, eta ez zen azterketa kriminalistikorik ez balistikorik ere egin». Bertze pasarteetako batek dio justizia administrazioan ikerketa judiziala bultzatzeko jarrera proaktiborik ez zela egon. «Inork inolako ikerketa eginbiderik proposatzen bazuen agenteak identifikatzeko edo 1984ko martxoaren 22an Pasaian zer gertatu zen argitzeko, fiskaltzak, ia-ia beti, aurka egin du», gehitu dute.
Pasaiako sarraskia gertatu zen tokia, Donibanen
41 urte
1984ko martxoaren 21ean Rosa Jimeno kidearen deia jaso zuen Aizpuruk, hurrengo gauean Pasaiako badian hitzordu bat ixteko. Jimeno, baina, Espainiako Poliziak atxilotu zuen egun batzuk lehenago, eta torturatu ostean behartu zuten dei hori egitera. Hala, Aizpuru, Isart, Izura, Delas eta Joseba Merino Pasaiako badiara txalupaz iritsi zirenean, polizia andana zuten zain Donibanen; 2004an, haietako batek auzitegietan onartu zuen ehundik gora zirela. Tiroka hartu zituzten, eta Merino atxilotu zuten, gainerakoak han hil zituzten.
