Traineru pasaitarrak, txukun Hondarribiko jaitsieran
Herriko zazpi traineruk parte hartu zuten larunbateko test estropadan. Hurrengo prestaketa lehia, San Pedrokoa.
Trintxerpe-Illunberen emakume beteranoen trainerua, larunbatean lehian.Jose A. Rodriguez Uda urrun da oraindik. Beraz, traineruen ligak iristeko tartea dezentekoa da. Hala ere, badira hilabete batzuk ontzi handietako kirolariak prestaketa lanean dabiltzala, eta entrenamendu sasoia nola doan jakiteko baliagarri izaten dira test edo prestaketa estropadak. Traineruen osasunean termometroa jartzeko aukera dira. Larunbat arratsaldean jokatu zuen Hondarribiko XXV. Traineru Jaitsiera, eta han izan ziren 36 traineruen artetik zazpi Pasaiakoak izan ziren: Trintxerpe-Illunberen beteranoen biak (emakumeena eta gizonena), San Juanen emakumeena, eta gizon seniorretan San Pedroren zein San Juanen A eta B Libia eta Erreka traineruak, hurrenez hurren. Emaitza txukunak eskuratu zituzten.
Beteranoen arteko hamar traineruetatik, gizonen Trintxerpe-Illunberena laugarren izan zen (15.23ko denborarekin), irabazle izan zen Badok 13 Atik 45 segundora. Kategoria horretan trintxerpetarren emakumeen eskifaia ere izan zen, 19.03ko denbora eginez helmugako balizan.
Senior emakumeetan, San Juango Batelerak ontzia seigarren izan zen (15.22). Ziaboga bakarreko eremuan EuskoTren Ligan diren ontziak izan zituen soilik aurretik: Arraun Lagunak irabazlea (15.00), Tolosaldea, Orio, Zumaia eta Hondarribia. Arrosen atzetik Zarautz, Ondarroa eta Hibaika sailkatu ziren.
Gizonen seniorretan bina ontzi uretaratu zituzten San Juanek zein San Pedrok. Horien artetik azkarrena, zazpigarren postuan sailkapen nagusian, San Juan A izan zen, 21.07ko denborarekin; banderaren jabe egin zen Donostiarrak 20.35ean gelditu zuen kronometroa. Geroago, hamargarren postuan, San Juan B izan zen (21.17), eta atzeraxeago San Pedro A (21.30). Moreen B traineruak 22.14an egin zuen bidea.
Traineruetan proben eta doitzeen aroan dira. Sasoi aurrean daude. Hondarribiko, nahiz aurretik egin diren prestaketa estropadak agian oso adierazgarriak izan ez, baina norabide baten berri eman dezakete. Neguan dira oraindik eskifaiak. Baina bandera baten usainean beti saiatzen dira kirolariak lana ahal den hobekien egiten. Zentzu horretan hurrengo aukera, eta test estropaden artetik azkena, Pasaian izango da. Sanpedrotarra Arraun Elkartearen testa hilaren 30ean (igandea da) izango da badian, goizez.
Albiste honetan dauden irudiak Jose Antonio Rodriguezek ateratakoak dira, denak Hondarribian izan ziren traineru pasaitarrenak. Haren sare sozialetan argazki askoz gehiago ikus daitezke.
